Ángeles Carbajal gana’l Premiu Xuan María Acebal de poesía n’asturianu

La ventésima segunda edición del Premiu «Xuan María Acebal» de Poesía n’asturianu recayó na escritora María Ángeles Carbajal Roza. El premiu, que concede la Conseyería d’Educación y Cultura, ta dotáu con 3.000 euros. El xuráu encargáu de valorar les ocho obres finalistes tuvo presidíu pol director xeneral de Planificación Llingüística y Normalización, Fernando Padilla Palicio, y integráu polos escritores Lourdes Álvarez García, Antón García Fernández, Héctor Pérez Iglesias, Xuan Santori Vázquez y Solinca Turbón Cuesta.

A esti gallardón podíen presentase poemarios de tema, xéneru y estructura llibres escritos en llingua asturiana con una estensión mínima de quinientos versos, siempre que foren inéditos y non premiaos n’otros concursos.

Ente les obres presentaes, el xuráu decidió por unanimidá conceder el premiu al poemariu tituláu Un vasu d’agua, nel que, según esplica l’acta, “trátase d’una reflexón empática, na que’l tonu unitariu, intensu y coherente de la voz poética, a lo llargu de la obra, emociona al llector”. La obra presentóse baxo’l seudónimu «La ponte». Abierta la plica, l’autora ganadora resultó ser María Ángeles Carbajal Roza.

María Ángeles Carbajal Roza, (Argüeyes, Siero, 1959) ye llicenciada n’Hestoria del Arte pola Universidá d’Uviéu y collaboradora de les revistes Clarín, Lliteratura, Reloj de Arena o Anáfora, ente más otres. Ye autora de los poemarios en castellanu La caligrafía de la distancia (1993) y La sombra de otros días (2002), y de los poemarios n’asturianu En campu abiertu, (col qu’algamó nel 2012 el Premiu «Teodoro Cuesta» de Poesía ) y L’aire ente la rama (col qu’algamó nel 2014 el Premiu «Xuan María Acebal» de Poesía, recibiendo asina mesmo nel 2015 el premiu al meyor llibru del añu n’asturianu qu’otorga la Tertulia Malory).