Antón de Marirreguera: Carreño, ñeru de la pluma n’asturianu

L’Ayuntamientu de Carreño, en collaboración cola Direición Xeneral de Planificación Llingüística y Normalización, l’Academia de la Llingua Asturiana (ALLA), l’Asociación d’Escritores d’Asturies y l’Asociación de Llibreríes del Principáu d’Asturies, entama un proyectu alredor de la figura d’Antón de Marirreguera coles mires de la puesta en valor de la poesía y la llingua asturiana al traviés del poeta, autor de la primer obra na nuesa llingua.

Les actividaes del primer programa cultural Antón de Marirreguera se van desendolcar ente’l 11 de xineru y el 29 d’abril de 2018.

-Poétiques: col envís de dar a conocer la poesía que se fai anguaño n’asturianu prográmense los actos nomaos Poetiques nos que se presentará la poética de poetes en llingua asturiana.

-Sones: Ciclu de conciertos “Sones del barrocu: la música qu’amó Antón de Marirreguera”. Ciclu de conciertos de música de cámara barroca que tendrán como escenariu los templos parroquiales. Esti ciclu de conciertos supondrá una ufierta cultural mui novedosa nes parroquies rurales del conceyu.

-Creación Lliteraria: col envís de fomentar la creación lliteraria n’asturianu, el programa cultural conseña dos actuaciones: cada añu convocaráse un concursu de poesía en llingua asturiana empobináu a escritores d’hasta 35 años. Y cada añu convocaráse un concursu empobináu al públicu escolar que premiará trabayos sobre un tema determináu fechos por escolinos/es de toa Asturies.

Alba de les lletres asturianes : cada añu fadráse un actu conmemorativu cenciellu col qu’entamará oficialmente la Selmana de les Lletres Asturianes. L’actu sedrá na parroquia de Llorgozana onde nació y vivió’l poeta Anton de Marirreguera a la hora l’alba. Consistirá nun cenciellu homenaxe poético musical.

Antón González Reguera, conocíu como Antón de Marirreguera, ye l’autor de la que se considera la primer obra lliteraria conservada n’asturianu, el Pleitu ente Uviéu y Mérida pola posesión de les cenices de Santa Olaya, escrita en 1639 y considerada una de les sos meyores obres. Tamién escribió’l poema Diálogu políticu, les fábules Dido y Eneas y Hero y Lleandro y los entremeses L’ensalmador, L’alcalde y Los alcaldes.

Antón de Marirreguera yá yera conocíu como escritor cuando estudiaba na Universidá, y les sos obres algamaron muncha sonadía en vida. Sicasí, al tresmitise de manera manuscrita y hasta oralmente, munches d’elles desaniciáronse. Según González Posada, el mesmu Antón de Marirreguera mandó al so sobrín, poco enantes de morrer, que quemara los sos papeles “pa que naide diga qu’un cura s’entretuvo nestes coses”. Les obres perdíes de les que se sabe la esistencia son les titulaes Los impuestos, Padrenuesu, Razonamientu ente Xuan Moñiz y Pero Suare y Décimes, a les que convién amestar Píramo y Tisbe, por considerase anguaño d’atribución duldosa la versión recoyida por Xosé Caveda y Nava.

La primer edición de les sos obres débese a González Posada, qu’asoleyó’l Pleitu ente Uviéu y Mérida y la primer octava de Dido y Eneas en Memorias Históricas del Principado de Asturias y Obispado de Oviedo (1794). Darréu, Xosé Caveda y Nava incluyó na so Colección de poesías en dialecto asturiano (1839) estos dos poemes, amestándo-yos Hero y Lleandro, Píramo y Tisbe, Diálogu políticu y L’ensalmador. La edición más nueva, y la más completa, ye la de Xulio Viejo, que lleva por títulu Fábules, Teatru y Romances (1997). Nel estudiu introductoriu d’esta edición dúldase de l’atribución a Marirreguera de la fábula de Píramo y Tisbe que recoyó Caveda. Xulio Viejo considera probable qu’esa composición seya obra del candasín Benito de l’Auxa, anque se sabe que Marirreguera escribió otra col mesmu títulu. En mayu del añu 2000 la Selmana de les Lletres Asturianes tuvo dedicada a la so obra. Con esi motivu, llevóse a escena l’adaptación de L’ensalmador fecha por Lluis Antón González y dirixida por Xulio Vixil. L’escritor asturianu, Marino Busto García, escribió sobre él el llibru tituláu El Príncipe de los poetas asturianos. Antón de Marirreguera (Candás, Conceyu de Carreño, 1985).

Calendariu xeneral d’activides en distintos llugares del conceyu los meses de xineru (díes 11 y 18), febreru (8 y 15), marzu (día 8) y abril (díes 5, 12, 27, 28, 29): http://bit.ly/2re54YB

Web: https://antondemarirreguera.es