El conseyeru d’Educación y Cultura entrega güei los premios lliterarios en llingua asturiana

El conseyeru d’Educación y Cultura, Genaro Alonso, va participar esta tarde na entrega de los premios lliterarios en llingua asturiana que convoca cada añu la Conseyería d’Educación y Cultura.

Na  gala van dase los cinco premios que la conseyería concedió en 2015 nes modalidaes de novela, poesía, ensayu, cómic y lliteratura infantil y xuvenil. Al actu va asistir tamién el director xeneral de Planificación Llingüística y Normalización, Fernando Padilla, y la directora xeneral d’Universidaes y Investigación, Cristina Valdés.

La periodista y escritora Vanesa Gutiérrez va presentar la gala, que va contar coles actuaciones d’Anabel Santiago y Xulio Arbesú.

En concreto, van dase los siguientes galardones:

Premiu Xosefa Xovellanos de novela (36º edición)

El premiu recayó nel escritor Francisco Álvarez pola so novela Lluvia d’agostu na que’l xuráu destacó “la estructura, la trama y desenllaz narrativu qu’inducen a la llectura continua de la obra, xuntu col manexu de fontes d’información y documentación qu’aporten verosimilitú a la historia narrada”.

Premiu Xuan María Acebal de poesía (21º edición)

L’escritor Antón García ganó esti premiu pola so obra Ferralla na que s’aborda un tópicu poéticu como’l de la muerte usando una estructura orixinal, de gran fuerza espresiva y con referencies cultes y populares perfectamente engarzaes”.

Premiu Máximu Fuertes Acevedo d’ensayu (21º edición)

El premiu recayó nel escritor José Ángel Gayol pola so obra Vértigu. L’atracción del abismu na sociedá contemporanea, presentáu pol so planteamientu modernu, la so estructura novedosa y l’harmonización de narración y xéneru ensayísticu con un llinguaxe áxil”.

Premiu María Josefa Canellada de lliteratura infantil y xuvenil (8º edición)

L’escritor Vicente García Oliva resultó ganador de la octava edición del premiu María Josefa Canellada por Fontenebrosa III: el final al destacar “l’habilidá cola que se constrúi un universu míticu y máxicu a partir del ritmu narrativu y la caracterización de los personaxes”.

Premiu Alfonso Iglesias de cómic (7º edición)

El músicu y diseñador gráficu Rumaldo Antón Barberu de Diego, Ruma Barbero, resultó ganador de la séptima edición del premiu Alfonso Iglesias de Cómic por El viaxe a la lluz. El xuráu destacó “la orixinalidá y complexidá de la historia, l’interés temáticu y la renovación de les soluciones gráfiques y cromátiques”.

(29 de xineru de 2016)