La escritora Esther Prieto, gallardonada col IX ‘Premiu Timón’

La escritora Esther Prieto acaba de ganar el IX Premiu Timón, convocáu pola Asociación Cultural L’Arribada p’autores en llingua asturiana y en gallego-asturianu, según alcuerdu d’un xuráu formáu por Vicente García Oliva, David M. Rivas, Xuan Pandiella y Humberto Gonzali.

Esther Prieto (Arenas, 1960) ye llicenciada en Filoloxía Hispánica pola Universidá d’Uviéu. Conocida sobre manera como poeta, nel 2001 ganó’l Premiu “Xosefa Xovellanos” de Novela cola obra Güelu Ismail, onde narra la vida del pueblu palestino. Sigue siendo la única muyer que ganó esti premiu nes trenta y cinco ediciones que se convocó. La so primer obra foi una narración infantil, El curiador d’estrelles (1987). Como autora de poesía diose a conocer en 1992 con Edá de la memoria. En 1998 ganó’l Premiu “Teodoro Cuesta” de Poesía cola obra La mala suerte, conxuntu de poemes intensos y curtios onde l’autora interrógase sobre la muerte y la vida. La so Gramática d’asturianu (2004) ye una obra de referencia na enseñanza de la llingua asturiana. Na actualidá trabaya n’Ediciones Trabe como codirectora.

Los ganadores d’esti Premiu Timón n’ediciones anteriores foron Nené Losada Rico (2007), Xuan Xosé Sánchez Vicente (2008), Manuel García ‘El Galano’ (2009), Roberto González-Quevedo (2010), Vicente García Oliva (2011), Antón García (2012), Miguel Rojo (2013) y Xosé Bolado (2014).

La distinción consiste nuna obra del escultor y ceramista xixonés Jesus Castañón, que se va entregar en setiembre na celebración de la décima edición de L’Arribada.