María Esther García López presenta ‘Quiero ser arcu iris’ nel Centru Niemeyer

La escritora María Esther García López (Valdés, 1948) presenta esti sábadu 27 de setiembre, a les 18:30 hores, el volume Quiero ser arcu iris, editáu por Pintar-Pintar. L’actu de presentación d’esti cuentu en versu ilustráu por Reyes Fernández Medina va tener llugar na llibrería del Centru Niemeyer d’Avilés.

María Esther García López ye autora d’una estensa bibliografía na que destaquen llibros de poemes como L.luribaga, Zamparrampa, Tiempu d’iviernu, Faraguyas (Haikus), o Pisadas. En narrativa destaquen obres como El tatuaxe y Historias de vida ya señas de muerte. Autora tamién de dellos títulos de lliteratura infantil como Musical-landia, Menú de versos y Deva y el Pitín, na so última publicación hasta esti Quiero ser arcu iris,  recopilaba una serie d’artículos publicaos en prensa ente los años 2009 y 2010, amosando una visión de los animales dende un puntu de vista etnográficu y sentimental baxo’l títulu d’Alredor de la quintana: animales y otros bichos.

Na presentación d’esta obra que supón la vuelta de García López a la lliteratura pa los más pequeños, xunto con ella y la ilustradora del relatu, van tar presentes l’actriz Olga Cuervo y Ángela Sánchez, representante de la editorial; así como Teresa Estrada Villazón, directora de la Cruz de los Ángeles, fundación a la que l’autora donó los derechos pola venta d’esti llibru.