Miguel Allende nel Taller de Llectura N’Asturianu de Corvera

 El Taller de Llectura n’Asturianu ye una actividá d’animación a la llectura p’adultos de calter gratuitu, consistente na llectura de llibros y alcuentros colos autores de los mesmos, y que busca ufrir la pluralidá y diversidá de voces y temátiques de la lliteratura asturiana d’anguaño. Esta sesión del Taller de Llectura va facese nel Centru Sociocultural de Las Vegas/Les Vegues el xueves 17 de payares a les 18 hores. El Taller de Llectura n’Asturianu ye una iniciativa de baldre de la Casa de la Llingua del Ayuntamientu de Corvera, en collaboración col área de Cultura del Ayuntamientu de Mieres y el Serviciu de Política Llingüística del Principáu d’Asturies, y ye impartíu pol técnicu responsable del Serviciu de Normalización Llingüística de Corvera, Rafael Rodríguez Valdés.

Miguel Allende (Llaviana, 1960), profesor del Orfanatu Mineru y poeta que ganó los premios más prestixaos de la lliteratura asturiana coles obres Güelgues de gallón y Pastoral en Sol mayor, ye l’escritor que va participar nesta nueva sesión del Taller de Llectura n’Asturianu de Corvera. Ye autor d’otres obres más, casu del poemariu Pallabres de payaso o de la traducción d’El médicu a palos de Moliére; tamién lleva’l blogue Cuadernu de rayes, del que salieron les histories que nel 2013 se publicaron en llibru col mesmu nome y col sellu d’Ediciones Trabe.

Cuadernu de rayes ye una compilación de relatos que primero publicara nel blogue homónimu. Les y los llectores van topar nél histories de ficción, narraciones enllenes de compromisu social, anécdotes qu’entemecen lo real colo fantástico y socedíos que lleven de l’Asturies campesina al París más lliterariu.