Presentación de ‘Ariel y Berta. Escursión per El Cabu Peñes’ de Xurde Fernández

El miércoles 21 de payares, a les 19 hores, na sala infantil de la biblioteca “Carlos González Posada” de Candás, va tener llugar la presentación del llibru Ariel y Berta. Escursión per El Cabu Peñes, del autor local Xurde Fernández y con ilustraciones de David G. Ferrero, que dientro de la colección Montesín publica la editorial Trabe.

Ariel y Berta, dos mellizos que tán acabante terminar el cursu quintu de Primaria, van dormir fuera casa, en tienda de campaña y ellos dos solos per primer vez na vida. Son too nervios y nun fueron a pesllar los güeyos en tola nueche… Van vivir una gran aventura, que pues compartir con ellos, si tu quies.

Xurde Fernandez (Candás, 1975) ye llicenciáu en Filoloxía Hispánica y especialista en Llingua Asturiana, de la que pon clase nel institutu de Candás. Conocíu a lo primero como narrador (cuentista y novelista), tien delles obres editaes (Volver, 2007; El color del escaezu, 2008, xunta Marián García; La espera, 2008; Ucrania y otros nomes de muyer, 2009; Díes d’iviernu, 2009; Intentu d’escritura, 2010; y Aeropuertu, xunta Marián García, 2011). Pero ye tamién poeta (Difícil, Premiu «Fernán-Coronas» de Poesía 2013), autor de testos dramáticos (Pa L’Habana, 2016) y d’una llarga retafila de llibros pa nenes y nenos.