Presentación de ‘Como la muda al sol d’una llagartesa’ de Berta Piñán

El sábadu 22 d’avientu a les 12:30 hores na biblioteca “Lorenzo Rodríguez Castellano” (El Campo San Francisco, Uviéu), entamada por Foro Abierto y Hoja de Lata Editorial, va celebrase la presentación de Como la muda al sol d’una llagartesa, la primer novela de Berta Piñán, distinguida col XXXVIII Premiu de Novela “Xosefa Xovellanos” 2017.

Trátase d’un thriller rural, onde la gran poeta canguesa pon de manifiestu la so maestría pa construyir personaxes y trames de tensión psicolóxica.

Nel maizal de Xuana Salabert aparez una bona mañana el cadabre d’una mocina. Los gueyos en blanco, la piel frío y la traza incierta de quien nun morrió nesi llugar. Enantes de que Xuana pueda dar parte a les autoridaes, un golpe tremendu na tiesta déxala inconsciente. Cuando recupera’l sentíu, el cuerpu ensin vida d’aquella neña yá nun ta ellí.

La vida tranquila nel campu que Xuana escoyera llevar lluéu de xubilase tórnase de sópitu violencia y medrana, esperando que vuelvan a por ella quienes acabaron cola vida de la rapaza. Namás puede contar cola ayuda incondicional de la so vecina, Taresa, muyer de sabiduría televisiva con un instintu natural pa ver el peligru, y de los guardies civiles del cuartel de la Villa, quienes por fin tienen un casu que los saque de la so rutina.

Otros artículos en esta sección...

Compartir

Sobre el autor

Red de Bibliotecas Públicas del Pdo. de Asturias