Presentación de ‘Familia con autorretratu al fondu’ de Aida Escudero

El xueves 15 de payares, a les 20:00 hores, va  tar na llibrería La Buena Letra la poeta Aida Escudero pa presentar el so llibru Familia con autorretratu al fondu. El llibru ta coeditáu por Impronta y l’Institutu Asturianu de la Mocedá. Va participar tamién nel actu Vanessa Gutiérrez.

Percorrer esti llibru nun ye una vuelta al ayeri, ye siguir el camín de la perda. Nun se trata d’allongar nel tiempu escenarios col envís de que siga vivo lo d’enantes, nun hai evocación, nin descripción, nin señardá. Lo que-yos da vida a los poemes de Familia con autorretratu al fonduye l’ ausencia; esa ye la fuercia que xenera’l discursu, lo que favorez la necesidá de cuestionar el pasáu, d’ella xurde la incógnita sobre la propia identidá y, al tiempu, l’impulsu pa zarrar firíes, p’atopar consuelu y p’asumir la inseguranza de cualesquier futuru, porque vivir «nun ye coleccionar razones / nin arrastrar / masque con arguyu / l’ensame d’escuses del pasáu».

Aida Escudero (Uviéu, 1985) ye profesora de llingua y lliteratura española y asturiana. En 2017 estrenó la so andadura poética con Esti llugar qu’agora ye nuesu: poemariu neanderthal, premiu de la XXIV edición del «Fernán Coronas». Tien poemes espublizaos nes revistes Lliteratura, editada pola Academia de la Llingua Asturiana, Larius y Formientu. El presente poemariu, Familia con autorretratu al fondu, ganador del Premiu Asturias Xoven de Poesía 2017, ye la obra cola que s’estrena nes lletres asturianes.

Otros artículos en esta sección...

Compartir

Sobre el autor

Red de Bibliotecas Públicas del Pdo. de Asturias