Presentación de ‘Incorrectos’ de David Artime

El periodista asturianu David Artime saca la so segunda novela n’asturianu, Incorrectos, que presentase el sábadu día 28 d’abril, a les 12 del meudía, dientro de los actos programaos por cuenta de la I Feria del Llibru de Candás, na Antigua Fábrica d’Ortiz.

Incorrectos ye una novela mayor, llamada a ser una de les grandes noveles de la lliteratura fecha n’Asturies, independientemente de la so llingua de creación. A lo llargo de 424 páxines, Artime desenvuelve la hestoria d’un alcuentru ente dos personaxes radicalizaos. Aníbal ye un violentu neonazi, bien conocíu nos ambientes de la estrema derecha madrilana. Maitane ye una militante d’ETA implicada en dos asesinatos. Un día les sos miraes crúciense y les sos vides cambien pa siempres. Empiecen entós a percorrer un peligrosu camín que busca un porvenir dignu. Detrás, el so pasáu. Delantre, un futuru inciertu. En mediu, l’aislamientu, la soledá y la opresión d’una sociedá hipócrita que solo perdona los errores cuando-y interesa. Pero ellos dos quieren siguir caminando. Quieren vivir. Quieren arrepentise… anque nun sepian bien de qué.

Col telón de fondu del procesu de reinserción de presos d’ETA y de la violencia na cai de grupos radicales, esta hestoria quier ser un berríu contra la dictadura de lo políticamente correcto. Nuna sociedá bipolarizada, na que naide ye llibre, la ética sucumbió énte la estética y el sistema obliga al individuu non a ser bona xente, sinón a paecelo. Ye la tiranía del posturéu bienpensante. Quien sal de los cánones yá sabe lo que-y queda: la esclusión y el linchamientu.

David Artime (Candás, 1979). Periodista venceyáu munchos años a la redacción n’Asturies d’Europa Press, lleva esti cursu dando clase d’español nun institutu de la periferia de París. Tien nel so haber dellos premios de narrativa que consiguió colos sos relatos curtios. Nel 2010 ganó’l Premiu Trabe de narrativa cola esitosa novela La bufanda (traducida al español), ambientada nel mundu del fútbol y de la so violencia.