El sábadu 4 de marzu na Casa de Cultura de Navelgas (Tinéu) a las 12:00 h. presentación del l.libru La casa d’Elías Veiga.
Participan amás del autor:
• Xosé Antón Ambás, músicu ya etnógrafu
• Esther Prieto, d’Ediciones Trabe
Colaboran:
• César Castaño, escultor
• Nicolás Fernández, vigulín
Con versos que vein enanchando l’infinitu campu de batalla qu’ía la vida ya l’alcordanza, los poemas de La casa espurren tamién el tiempu del pasáu ya la memoria. Cona l.lingua de casa, l’asturianu occidental, Elías Veiga vei construyendo un universu simbólicu que retrata de manera directa ya realista la pérdida ya’l desaniciu d’una forma de ser, de tar ya d’entender el mundu: l’Asturias rural, pero tamién universal, que pasín a pasu vei deixando’l posu de la sua vida ente las sombras del silenciu.
Elías Veiga (Presnes, Ayande, 1972) ía yá una voz consolidada, pura ya clara, de la poesía asturiana con tres poemarios publicaos: La tierra fonda (2004), Robinson Astur (2007) ya Testamentu (2013).