Presentación de ‘Little Babilonia’ de Pablo X. Suárez en La Pola Siero

Mañana xueves día 26 d’abril preséntase nel Teatru-Auditoriu de La Pola, en Siero, a les 20 hores, el llibru ganador del premiu «Xuan María Acebal» de poesía. Va presentalu’l poeta y críticu Miguel Allende.

Trátase de Little Babilonia, de Pablo X. Suárez, seguramente l’autor más influyente de la lliteratura asturiana actual. Pablo X. Suárez nació n’Orviz, Siero, en 1981. Ye filólogu y especialista en Llingua Asturiana. Creador de la Timba Poétika y poeta oral, tien publicaos n’asturianu los poemarios Asturiana Beat (2005) y El sistema débeme una chocolatina (2011), amás del volume de rellatos Yoni y yo. Ye autor tamién de les obres en castellanu Pop retórika (2010) y Cómo evitar el apocalipsis (2016).

Pablo X. Suárez, l’enfant terrible de la lliteratura asturiana, llevaba cuasi siete años ensin publicar poesía n’asturianu, anque adelantare dellos poemes inéditos per antoloxíes (La prueba del once, del 2016) o nos recitales nos qu’aveza a participar, les Timbes poétikes qu’él organiza y a les que punxo nome. Nesta entrega nueva, nos 35 poemes de variada construcción y temática de Little Babilonia, Suárez tresmite, col so desenfadu avezáu munches veces enfadáu, una mirada crítica hacia lo cotidiano, siempre a partir de la tradición cultural d’occidente, pero ensin dexar de poner atención pa los márxenes, cerca de la contracultura. El xuráu que-y otorgó a esti llibru’l Premiu Xuan María Acebal destacó «el nivel llingüísticu y estilísticu y la brillantez de les imáxenes d’un testu que xuega y mez la tradición más clásica coles referencies más pop».

Dixo d’él Antón García, profesor de lliteratura asturiana na Universidá d’Uviéu: «Tolo que lleva publicao Pablo X. Suárez depués del so primer llibru ye un milagru. La solapa d’Asturiana Beat nel 2005, por indicación del so autor, comunicaba mui seria la muerte del poeta a los 24 años, en circunstancies nunca aclaraes. Hubo quien lo creyó y quien fixo llegar les sos condolencies a los editores. Pero Suárez sigue vivo, y la so intensa obra posterior ye un verdaderu regalu».

Pal críticu Miguel Allende, «tres esa pinta de poeta bohemiu pudimos comprobar que s’escondía un autor que curiaba la llingua y los sos recursos estilísticos, un filólogu que dominaba’l llinguaxe, tanto l’asturianu como’l castellanu, un Valle-Inclán de l’Asturies del sieglu XXI, porque supimos como él nos dicía entellinies, que nun ye lo mesmo asumir que toos pertenecemos d’una o otra manera al sistema, que tragar tolo que diz el sistema».