Presentación de ‘Media vida: poemes y cantares’ de Pablo Texón

El martes 12 d’avientu, a les 20:00 hores, na llibrería La Buena Letra de Xixón, Pablo Texón va presentar el so llibru Media vida: poemes y cantares, la poesía reunida de quien ye una de les voces imprescindibles de la lliteratura asturiana. La presentación va correr al cargu del escritor Xandru Fernández.

Si en daqué ta del alcuerdu la crítica ye na importancia capital que tien la obra de Pablo Texón na lliteratura asturiana: en resume, talentu y compromisu. La so poesía, afarada, utiliza un discursu figurativista nel qu’engarza, con personalidá propia, detalles d’irracionalismu; esa obra, esistencialista, entiende la vida como desposeimientu, pero tamién como celebración. Agora axúntase nun volume la so producción poética: los llibros editaos, los poemes inéditos, les lletres de cantares que foi faciendo pa dellos grupos musicales de la escena asturiana, les traducciones de Carver y un esactu y bien interesante apéndiz sobre la concepción poética de Wittgenstein. En xunto, Media vida resulta una obra na que, a pesar de la variedá de llinguaxes usaos nella, resalta la coherencia d’una mesma voz.

Pablo Texón Castañón (Felechosa, 1977). Profesor d’Asturianu y de Llingua Castellana y Lliteratura, ye collaborador habitual en delles publicaciones (La Nueva España, El Comercio, Eventual, Lliteratura, Les Notícies, El Súmmum, Campu de los Patos, etc.). Editó’l poemariu Toles siendes (Premiu «Nené Losada Rico») nel 2005, el volume de narrativa Catedral (2006), el llibru de poesía La culpa y la lluz (ganador del Premiu «Teodoro Cuesta») nel 2007 y Singuralidá, tamién de narrativa, nel 2011. Esi mesmu añu ve la lluz L’alma robada, testos en prosa poética basaos en fotografíes de Pablo Lorenzana y Mario Rojas. Tien fecha la versión asturiana de Xulia (2007), d’August Strindberg, pa Teatro Margen, y publicó nel 2013 Un corte de pelo, selección poética de Raymond Carver.