Presentación de ‘P’anular los adioses’ de Lourdes Álvarez

Esta selmana va presentase  P’anular los adioses (Trea, 2018) de Lourdes Álvarez en trés llugares: 

- Xixón, el martes 6 de marzu na llibrería De bolsillo

- Uviéu, el miércoles 7 de marzu na llibrería Santa Teresa

- Mieres, el sábadu 10 de marzu na llibrería La Llocura

Depués d’un silenciu bien llargu —nel 2006 espublizó Mediando les distancies, una recopilación de la so obra poética qu’inclui, amás, el llibru inéditu Como aquella que yeres, col que ganó nesi mesmu añu’l Premiu Teodoro Cuesta—, P’anular los adioses ye de xuru’l poemariu más meditáu, ellaboráu y cuidáu de Lourdes Álvarez (L’Agüeria d’Urbiés, Mieres, 1961), quiciás la voz más singular del Surdimientu poéticu asturianu.

Perfiláu nun momentu vital intensu —«A la vuelta la vida / rasga la pena llarga»—, refuga l’escesu y lo circunstancial y marca la distancia afayadiza ente’l duelu vital nel que s’enmarquen la mayor parte de los poemes —escritos nestos diez años últimos— y la capacidá d’articulalos a la fin nun conxuntu coherente y sólidu.