Presentación de una nuesa reedición de ‘Hestoria universal de Paniceiros’ de Xuan Bello

Mañana sábadu día 12 a les 19:00 hores va presentase na Plaza Trascorrales d’Uviéu, dientro de los actos de LibrOviedo 2018, la nuesa reedición correxida y aumentada de la Hestoria universal de Paniceiros, el llibru insignia de la lliteratura asturiana.

Esta obra, crónica emocional d’un territoriu yá míticu, ye una metáfora del mundu. El pueblu que da nome a estos relatos tien una doble dimensión: la real, el llugarín de l’alta sierra de Tinéu que formen un puñáu de cases, y la intelectual, una potente creación que Xuan Bello fai capital d’un territoriu lliterariu propiu.

Nesti espaciu narrativu xúntense la realidá y la ficción, lo local y lo universal, la vida y la muerte, ensin que falten figures lliteraries a les que Bello da carta de vecindá: Cernuda, Quasimodo, Casariego, Borges, Cunqueiro, Drudak…

Esta obra punxo nel mapa de la lliteratura mundial la modernidá de la lliteratura asturiana, llamando poderosamente l’atención pola maestría cola que Bello relacionaba dos mundos n’apariencia dispares: la vida cotidiana d’un pueblu agrícola y ganaderu del monte altu asturianu y la lliteratura más universal.

Xuan Bello (Paniceiros, 1965), Premiu Nacional de Lliteratura 2017, ye la voz más conocida de les lletres asturianes. Poeta, narrador y traductor, empieza publicando poesía en 1982, Nel cuartu mariellu, al que siguen Llibru de les cenices (1987), Los nomes de la tierra (1991), El llibru vieyu (1994), Los caminos secretos (1997) y El llibru nuevu (2017). En 2002 aparez Historia universal de Paniceiros, la obra narrativa que-y da proxección peninsular, tres de la que vienen Los cuarteles de la memoria (2003), Meditaciones nel desiertu (2003), La nieve y otros complementos circunstanciales (2007), Al dios del llugar (2007) o Unas poucas cousas guapas (2009) ente otros títulos.

Con esta nueva edición de la exemplar Hestoria universal de Paniceiros damos empiezu en Saltadera a la publicación ordenada de la obra en prosa, n’asturianu, d’esti autor, dientro de la «Biblioteca Xuan Bello» de la colección «Adréi».