Presentación del llibru ‘L’arume’ d’Adolfo Camilo Díaz

Miércoles 28 de febreru a les 19:30 h. nel  Salón d’actos del Centro de Servicios Universitarios, La Ferrería (C/ La Ferrería, 7-9, Avilés) presentación del llibru L’arume (Trabe, 2017) d’Adolfo Camilo Díaz.

Machu Picchu (o Peña Vieya) ye una de les siete maravíes del mundu, pero ye tamién un motel de carretera aonde lleguen persones desahuciaes de la vida, arrasaes pola enfermedá del dolor o del imposible escaezu. Dicen que nel Machu Picchu peruanu hai una piedrona, como una llábana bien grande, que-y llamen «roca sagrada». Nel otru Machu Picchu, el motel de carretera, nun hai más que cuartos de dormir con cuadros d’escenes sangrines de caza, d’animales acorripiaos ensin más presente que la muerte. Como Dubardu, el protagonista d’esta novela circular, personaxe agónicu, acorripiáu cuando pola vida, cuando pola muerte de los seres que más quier.
Escrita con trazu rápidu, con un daqué de cinematográfico, L’arume fala de la vida, de la muerte y de la única esperanza que-y queda al ser humanu: suañar con Machu Picchu y la so piedrona sagrada, símbolu de la esperanza de la vida y la humanidá.

Adolfo Camilo Díaz (Caborana, Ayer, 1963) ye ún de los escritores más prolíficos de les lletres asturianes. Narrador, ensayista, dramaturgu, traductor, xestor cultural y autor de delles noveles xuveniles, ta acabante algamar l’últimu premiu d’una llarga filera d’ellos: el María Josefa Canellada de Lliteratura Infantil y Xuvenil na convocatoria del añu 2016, cola novela La mar.

Participen amás del autor:

• Xulio Vixil Castañón, escritor y profesor
• Esther Prieto, Ediciones Trabe