Presentación del poemariu ‘Esconderite’, de Berto García, en Corvera

El miércoles 21 d’avientu a les 19:00 hores va celebrase nel Aula Polivalente del Centru Sociocultural de Las Vegas/Les Vegues, un alcuentru lliterariu colos escritores Berto García y Esther Prieto.

L’escritor corveranu Berto García (Las Vegas/Les Vegues, 1975) va presentar la so última producción lliteraria, el poemariu Esconderite, col que continúa una trayectoria lliteraria onde destaquen títulos como Cuando’l mundu debala (Premiu “Llorienzu Novo Mier” de l’Academia de la Llingua Asturiana) o Manual contra’l vacíu (Premiu “Fernán-Coronas”), Tendal o Inercia.

Berto García publica’l so sestu poemariu, Esconderite, onde reflexona de los mieos y de les trampes que ponen les persones pa nun almitir la realidá mesmo que de los espacios y los momentos que se constrúin en cata de seguridá y tranquilidá. 24 poemes que falen, en fin y en pos, de la vida.

El poeta corveranu va tar acompañáu nesta presentación pola escritora Esther Prieto, una de les autores más señalaes del Surdimientu, con obres como Edá de la memoria, La mala suerte, Güelu Ismail o Tres de la quema. Na actualidá, Esther Prieto ye responsable d’Ediciones Trabe, sellu editorial asturianu con más de venti años de llabor y que ye l’encargáu de sacar al mercáu la última obra lliteraria del escritor corveranu.

D’otra manera, esta actividá, d’asistencia llibre y gratuita, va suponer tamién el cierre del Cursu Avanzáu de Llingua Asturiana que vieno desarrollándose nos meses últimos nel Centru Sociocultural de Las Vegas/Les Vegues.