Presentación en Xixón de ‘L’amor suicida’ de Miguel Rojo

El martes 23 d’avientu a les 20:00 hores, presentación del llibru L’amor suicida/El amor suicida de Miguel Rojo. L’actu, que va tener llugar nela Sala de conferencias del Centru de Cultura Antiguu Institutu,  intervienen, amás del autor, Marta Mori, escritora y autora del prólogu, María de Álvaro, Xefa de la sección de Cultura d’El Comercio y Ruma Barbero y Juan Hernaz, ilustradores.

Los trenta y dos cuentos qu’inclúi Miguel Rojo nesti volume fueron saliendo nes páxines d’El Comercio y de La Voz de Avilés, d’ehí la denominación de «cuentos d’encargu». L’universu ficcional que l’autor remana nestes páxines ye bien ampliu; nél hai espaciu pa lo fantástico y lo costumista, pa lo metalliterario y lo dramático. D’igual manera, quien narra va cambiando de cuentu en cuentu de la primer persona a la tercera, del narrador masculín a la voz femenina que nos cuenta… Nun hai tema dengún que-y seya ayenu a Miguel Rojo, que s’amuesa equí como un escritor de mirada aliella y que ye a trescribir les coses del mundu y de la vida cola maestría y la pureza del narrador avezáu.

Miguel Rojo (Zarracín, Tinéu, 1957), escritor de reconocíu prestixu nes lletres asturianes, tien yá una llarga trayectoria lliteraria mesmo n’asturianu qu’en castellanu. Conocíu sobremanera como poeta y narrador, los sos últimos poemarios son Territorios –ed. billingüe– (2007) y El paséu (2011). Autor de la novela más vendida de la narrativa asturiana del Surdimientu, Histories d’un seductor (Memories d’un babayu) –1993–, que cuenta tamién con versión castellana, al igual que la mayoría de les sos publicaciones infantiles: De qué tará fecha la lluna (2008) o El viaxe de Tin y Ton (2008). En castellanu destaquen, amás del relatu Raitán el petirrojo (2003), les noveles La senda del cometa (2007) y La hoja del Ginkgo biloba (2010).