Presentación n’Uviéu de ‘Vértigu’ de José Ángel Gayol

El sábadu 19 de payares a les 18:00 hores presentación del llibru Vértigu. L’atracción del abismu na sociedá contemporánea de José Ángel Gayol, Premiu d’ensayu «Máximo Fuertes Acevedo» 2015 en Santa Teresa librería café (c/ Covadonga, 11, Uviéu)

Con Vértigu, obra d’estructura bien novedosa, l’autor indaga sobre un mundu aceleráu, nel que’l vértigu apodera con too hasta «nun dexar tiempu pa pensar, pa reflexonar con vagar». Dende’l cumal de los rascacielos de Wall Street, de Dubái o de Kuala Lumpur naide nun tien posa: homes y muyeres cuerren como formigues ensin destín. Nesta obra, l’autor tenta de desentrellizar l’andoliar del ser humanu nuna sociedá cambiante y inestable que lu fai andar siempre al debalu, col maréu del vértigu y de la velocidá. Y failo con una narración harmoniosa y un llinguaxe bien áxil y llixeru.

José Ángel Gayol (Mieres del Camín, 1977) ye escritor y críticu lliterariu. Como poeta tien publicaos los llibros Con el velo de una sonrisa (2006, en castellanu), Los poemes del oriental (2012), El llibru de les coses misterioses (2013), Los suaños y los díes (2014) y Una selmana y otros díes (2015). Nel 2007 vio la lluz la so única novela, Argonautes, y unos años depués, nel 2011, estrena la so carrera como escritor de testos teatrales con Ensin noticies del fin del mundu.