La Cátedra Leonard Cohen tien ente los sos propósitos el fomentu de la creatividá poética y musical na nuestra sociedá, mesmo dende’l puntu de vista divulgativu que dende’l formativu, propósitu que se concreta n’actuaciones qu’averen la tarea de los creadores hacia un públicu activu que pueda beneficiase, de manera práctica, de les enseñances d’estos propios creadores. La Cátedra Leonard Cohen, col patrociniu de la Fundación Banco Sabadell convoca, nesi sentíu, el taller de creación tituláu “(Per)versiones y otros xuegos poéticos” a cargu de la escritora Vanessa Gutiérrez. El taller entiéndese como un sitiu d’alcuentru ente’l creador y el so públicu, que se basa nel intercambiu de formes y fórmules creatives, nel desarrollu de técniques lliteraries y na aplicación práctica de modelos poéticos.
PROFESORA
Vanessa Gutiérrez
PLACES DISPONIBLES
40
DESTINATARIOS
Actividá de baldre y accesu llibre al públicu en xeneral, siempre que se faiga la inscripción nel plazu marcáu. L’almisión de participantes ta llimitada a 40 solicitúes, que van ser aceptaes por rigurosu orde de recepción.
FECHES DE REALIZACIÓN y HORARIU
15 de diciembre, de 16 a 20 h. / 15 d’avientu, de 16 a 20 h. (Sesión taller)
16 de diciembre, de 16 a 20 h. / 16 d’avientu, de 16 a 20 h. (Sesión taller)
17 de diciembre, de 19 a 21 h. / 17 d’avientu, de 19 a 21 h. (Llectura comentada)
IMPORTE DE LA INSCRIPCIÓN
De baldre
FORMA D’INSCRIPCION
Mandando un corréu ellectrónicu a dirextension@uniovi.es nel que se van facer constar los siguientes datos de la persona que s’inscribe: nome y apellíos, dni, teléfonu, dirección postal y corréu ellectrónicu.
PERÍODU D’INSCRIPCIÓN
Del 24 de payares al 14 d’avientu de 2015.
CERTIFICÁU D’ASISTENCIA
Les persones apuntaes nel taller y que vaigan al 90% de les sesiones van poder pidir un certificáu d’asistencia que va expidir la Universidá d’Uviéu, previu pagu de 5,44€ en conceptu de gastos xenerales y xestión institucional (art. 16.2 del Reglamentu d’Estensión Universitaria. BOPA 23/04/2015).
LLUGAR D’IMPARTICIÓN
LAUDEO Centru Cultural d’Estensión Universitaria (San Francisco, 1). Aula Rector Alas
CONTENÍU
Les sesiones de los díes 15 y 16 d’avientu van destinase a la base práctica del taller, que va empezar con una presentación de los participantes pa poner en común la so propia esperiencia cola poesía (qué los anima a dir al taller, qué entienden por poesía, qué gustos tienen, si escriben o non, qué conocen de la lliteratura asturiana, etc…), cola fin de, amás de presentase, afitar una dinámica distendida y participativa de cara al restu de les xornaes. Porque, lloñe de basar el taller en clases teóriques, nos dos primeros alcuentros va trabayase sobre diferentes poemes al traviés de dellos xuegos lliterarios, de forma que sían los participantes los qu’a la fin construyan los sos propios testos. Asina, búscase que, de manera entretenida, los participantes nel taller non solo pierdan el mieu a criar y a amosar les sos creaciones, sinon que s’averen a la historia de la lliteratura asturiana, de los clásicos a la poesía más mozo, pasando de lo culto a lo popular en diferentes exercicios. A mou de remate, la sesión del 17 va ser abierta al públicu en xeneral, y va consistir nuna llectura comentada de testos mesmo per parte de Vanessa Gutiérrez como de los alumnos del taller qu’asina lo quieran.