El miércoles 28 de febreruu entama’l Taller Escrifala, taller de conversación y de redacción n’asturianu, que dende esi día va desarrollase tolos miércoles dende les 18 a les 20 hores nel Centru Sociocultural de Las Vegas/Les Vegues.
Esti taller va centrase n’esclusiva nel usu oral del asturianu y na meyora del asturianu escrito. Asina les coses, quier ser una manera de conocer les posibilidaes espresives del asturianu, estremando rexistros, aumentando’l léxicu, etc.; y tamién un mecanismu d’afondar y encuriosar la manera d’escribir en llingua asturiana.
Acordies con estes característiques, recomiéndase tener un conocimientu previu, dirixéndose n’especial p’aquelles persones que yá fixeran cursos d’asturianu (niveles básicu y avanzáu).
Esti taller tien una duración de cincuenta hores con dos períodos de sesiones, de febreru a mayu y d’ochobre a avientu.
El taller Escrifala, de calter gratuitu, va desenvolvese en sesiones selmanales de dos hores caúna que van facese cada miércoles nel Centru Sociocultural de Las Vegas/Les Vegues, emprimando éstes el miércoles 28 de febreru. Les persones interesaes han inscribise nos rexistros municipales.