Tertulia Malory entrega esti vienres el so premiu al meyor llibru del añu n’asturianu del 2014

La Tertulia Malory, de L’Entregu, va entregar esti vienres 23 d’ochobre, a les cinco y media de la tarde, el premiu al meyor llibru n’asturianu del 2014, nun actu públicu que se va celebrar nel pub Tom Malory de L’Entregu, onde dende fai 17 años la tertulia vien axuntando selmanalmente. La obra ganadora d’esta cuarta edición del premiu ye’l conxuntu de cuentos Más espeso que l’agua, de la escritora ayerana Consuelo Vega. El xuráu tuvo formáu polos escritores Xulio Arbesú, José Luis Rendueles, Pablo Rodríguez Medina, Solinca Turbón, David Fernán, Roberto Corte, Chechu García y Henrique G. Facuriella, que fallaron el premiu nuna sesión especial de la tertulia’l 26 de xunu del 2015, onde destacaron: «una magnífica coleición de cuentos que algamen con voz sensible, firme y poderosa el terrén de la maestría narrativa, amosando al llector el delicáu misteriu que s’escuende tres lo cotidiano, siempre con una prosa esencial, guapa, ensin aditivos. Histories de xente corriente, vides comunes que gracies a l’habilidá d’una observadora atenta resulten aventures extraordinaries.».

El gallardón consiste nuna ilustración d’Alfonso Zapico y una medaya conmemorativa. Esta ye la cuarta vez que’l grupu concede esti premiu, l’añu anterior resultó ganadora Carne de melandru, novela xuvenil de Milio Rodríguez Cueto. Con esti premiu, los sos entamadores quieren prestixar les lletres asturianes, al empar que se da difusión a les obres que, a criteriu del xuráu, sían consideraes los meyores llibros escritos cada añu n’asturianu.

Más espeso que l’agua, ye una coleición de cuentos onde se recueyen narraciones escrites nel espaciu de venti años, con una voz personal que nos regala maxistrales discursos demográficos como nel relatu Llevaben la comida, o la emocionada señalda del qu’aporta a una patria estraña, qu’atopamos nel cuentu Gouda. Cada relatu va dir enseñando fragmentos de la esistencia de xente cola que topamos a diario, xente que tres d’una aparente normalidá, escuende traxedies, enormes sacrificios, amores…

Consuelo Vega (Bustillé, Ayer, 1961). Llicenciada en Filoloxía. Como narradora diose a conocer nel añu 1995 cola obra Cera frío relatu curtiu col qu’ algamó en 1994 el Primer Premiu María Xosefa Canellada de Narrativa. Ye coautora, xunto con Antón García, del ensayu Del centru a la periferia (1993), una interesante reflesión sobre’l procesu hestóricu y cultural que llevó a Asturies de ser centru d’ella mesma a ser periferia d’una entidá superior. Asina como del trabayu Una mirada a la muyer na historia nel añu 1999. Ye tamién autora de traducciones de Peter Handke, Christine Nöstlinger, ente otros.