Vanessa Gutiérrez llogra’l Premiu ‘Máximo Fuertes Acevedo’ d’Ensayu n’asturianu

Vanessa Gutiérrez resultó ser la ganadora de la XXII edición del Premiu ‘Máximo Fuertes Acevedo’ d’Ensayu n’asturianu, que con una dotación de 3.000 euros concede la Conseyería d’Educación y Cultura. A esti gallardón podíen presentase obres de tema, xéneru y estructura llibre que reunieren les característiques del xéneru ensayísticu entendíu na so amplitú.

El director xeneral de Planificación Llingüística y Normalización, Fernando Padilla Palicio, presidió esti xueves la reunión del xuráu, que tuvo tamién integráu polos escritores y investigadores Luis Casteleiro Oliveros, José Ángel Gayol, Marta López Fernández, Elena de Lorenzo Álvarez y Xosé Miguel Suárez Fernández.

Ente les obres presentaes, el xuráu decidió por mayoría conceder el Premiu a la titulada El paisaxe nuestru, que se presentó col seudónimu Recusa Paigona, al reconocer “el pulsu lliterariu del testu y la modernidá d’una estructura na que se fai dialogar a testos escritos y orales de distintes dómines alredor d’un mesmu paisaxe”, según destaca’l fallu.

Ana Vanessa Gutiérrez (Urbiés, Mieres, 1980) ye escritora y periodista. Foi redactora del selmanariu Les Noticies y presentadora de programes de televisión como Pieces, amás de collaborar davezu como articulista n’El Comercio. Presenta y dirixe el programa de la RPA ‘Ente toos’. Autora con Beatriz Redondo Viado del ensayu El país del silenciu (Ámbitu, 2007), Vanessa Gutiérrez destaca como poeta colos poemarios Onde seca l’agua (Trabe, 2003) y La danza de la yedra (Trabe, 2004), col que llogró′l Premiu «Teodoro Cuesta». Como narradora publicó Les palabres que te mando (Ámbitu, 2006) y La cama (Ámbitu, 2008). Parte de la so obra ta traducida al catalán, al gallegu, al inglés, al checu, al francés y al húngaru, y recoyida en diverses antoloxíes y revistes.

Otros artículos en esta sección...

Compartir

Sobre el autor

Red de Bibliotecas Públicas del Pdo. de Asturias