Xulio Arbesú gana’l Premiu Xosefa Xovellanos de novela n’asturianu

La trentésima séptima edición del Premiu Xosefa Xovellanos de Novela n’asturianu recayó nel escritor Xulio Arbesú, ganador d’esti premiu n’otres dos ocasiones. El galardón, que concede la Conseyería d’Educación y Cultura, ta dotáu con 3.000 euros.

El xuráu encargáu de valorar les ocho obres finalistes tuvo presidíu pol director xeneral de Planificación Llingüística y Normalización, Fernando Padilla Palicio, ya integráu polos escritores Paco Álvarez, Pilar Arnaldo, José Luis Rendueles, Xosé Nel Riesgo y l’asesora técnica del Serviciu de Planificación Llingüística y Normalización, Juncal García Velasco.

A esti galardón podíen presentase noveles de tema, xéneru y estructura llibres escrites en llingua asturiana con una estensión mínima de setenta y cinco páxines, siempre que fueren inédites y non premiaes n’otros concursos.

Ente les obres presentaes, el xuráu decidió por mayoría conceder el premiu a la novela titulada El valor del Rei, na que, según esplica l’acta, “destaca l’ambientación que s’avera a una dómina histórica mala de recrear y que consigue espeyar la vida nel sieglu VIII de forma verosímil; trátase d’una novela coral na que resuelve con gran aciertu la convivencia de tres voces narratives que se dan pasu a lo llargo de la novela”.

La obra foi presentada col seudónimu Hermes Liébana. Abierta la plica, l’autor de la obra ganadora resultó ser Xulio Arbesú.

Xulio Arbesú (L’Entregu, 1957) ye ún de los narradores de más prestixu nel panorama lliterariu asturianu d’anguaño. Nel añu 2002 llogra el premiu Xosefa Xovellanos cola novela histórica Potestas; nel 2007 vuelve  ganalu cola obra  El pisu d’enriba. Amás d’una bayurosa obra narrativa, l’autor tamién abordó con ésitu’l xéneru ensayísticu; llogra en dos ocasiones el Premiu d’ensayu “Máximu Fuertes Acevedo”,que concede la Conseyería d’Educación y Cultura, cola obra El destín treshumanu en 2009 y nel añu 2012 col ensayu Los deseos del dineru. Ente otres facetes de la so personalidá creativa destaquen la composición musical y la realización cinematográfica.