Xuliu Arbesú nel Taller de Llectura n’Asturianu de Corvera

El Taller de Llectura n’Asturianu ye una actividá d’animación a la llectura p’adultos de calter gratuitu, consistente na llectura de llibros y alcuentros colos autores de los mesmos, y que busca ufrir la pluralidá y diversidá de voces y temátiques de la lliteratura asturiana d’anguaño. Tres del paréntesis braniegu, el Taller de Llectura n’Asturianu vuelve pa Corvera, esta vuelta con Xulio Arbesú.

Xulio Arbesú (L’Entregu, 1957), diplomáu en Ciencies Empresariales y trabayador del Ayuntamientu de Samartín del Rei Aurelio, ye ún de los escritores más reconocíos de la narrativa asturiana d’anguaño. Asina les coses, ye autor de delles noveles (Misión Pelayo –Premiu “Llectures pa rapazos” de l’Academia de la Llingua Asturiana del 2001-, Un raposu en Tresmonte –Premiu “Llorienzu Novo Mier” de l’Academia de la Llingua Asturiana del 2002-, El pisu d’enriba –Premiu “Xosefa Xovellanos” del 2007-, Eternu negociu –Premiu de Narraciones Trabe del 2011-), autor d’ensayos como El destín treshumanu o Los deseos del dineru (con entrambos los dos llogró’l Premiu d’Ensayu “Máximo Fuertes Acevedo” nos años 2009 y 2012), y a ello hai qu’añader el llabor como músicu, con obres como La mina que nun cierra y onde hai que sorrayar la collaboración con Anabel Santiago, casu del discu Llances de papel; nél alcuéntrase’l tema La lloca, col que la cantante asturiana llogró’l Premiu al Meyor Cantar esti añu.

Potestas, novela cola que ganó’l Premiu “Xosefa Xovellanos” de Narrativa nel 2002 y cola que participa nel Taller de Llectura, ye una novela histórica que se desenvuelve nel sieglu XII y onde afonda los conflictos del Reinu de Llión, garrando como filu la figura del señor asturianu Gonzalo Peláiz.

El Taller de Llectura n’Asturianu ye una iniciativa de baldre de la Casa de la Llingua del Ayuntamientu de Corvera, en collaboración col área de Cultura del Ayuntamientu de Mieres y el Serviciu de Política Llingüística del Principáu d’Asturies, y ye impartíu pol técnicu responsable del Serviciu de Normalización Llingüística de Corvera, Rafael Rodríguez Valdés.

Esta sesión del Taller de Llectura va facese nel Centru Sociocultural de Las Vegas/Les Vegues el xueves 20 d’ochobre a les 18 hores.