Una esposición sobre la editorial Trabe abre la Selmana de les Lletres de Samartín del Rei Aurelio
Samartín del Rei Aurelio celebra la XXXIV edición de la Selmana de les Lletres Asturianes con un programa enllenu d’actividaes que se van desendolcar ente los díes 29 d’abril y 3 de mayu. La principal novedá esti añu ye que los actos alredor de la llingua dexen de tar centralizaos na Casona del Bravial, sede de la Oficina de Normalización Llingüística del conceyu, pa treslladase a puntos de toles poblaciones y llegar asina a un mayor númberu de xente.
La selmana ábrese’l llunes 29 d’abril cola inauguración de la esposición “Trabe, historia d’una editorial asturiana” na que se va facer un repasu, per un llau de los 21 años de vida d’esta editorial al través de llibros, prebes d’imprenta, cuadros etc., y per otru una una revisión del procesu técnicu de producción. Esta esposición va poder visitase hasta’l día 31 de mayu na Casona del Bravial de Blimea n’horariu de 9 a 13 h. de llunes a vienres.
A partir d’esi día, y a lo llargo de tola selmana’l Colexu Públicu Rei Aurelio de Sotrondio va contar cola esposición del llibru Mieu, de la Editorial Pintar-Pintar, escritu por Milio del Nido y con ilustraciones d’Alberto Sastre. Los,-es escolinos, -es del centru van facer distintes actividaes alredor d’esta esposición.
Nun van faltar tampoco les esposiciones en centros de secundaria, nesti casu va ser en L’Entregu, nel IES Virgen de Covadonga, onde durante tola selmana van contar cola muestra Escritores n’asturianu en Samartín del Rei Aurelio na qu’a traviés de 10 paneles se fai un repasu de la biografía, obra y testos de distintos autores del conceyu. A lo llargo d’esta selmana los,-es alumnos, -es del centru van trabayar cuestiones rellacionaes colos conteníos d’esta esposición.
Amás esti añu celébrase la 3ª edición de los Alcuentros con Escritores, actividá na que un grupu d’escolinos, -es fala con un autor sobre ún de los sos llibros. Esti añu van facelo un grupu d’alumnos,-es de sestu de primaria del Colexu Públicu El Parque, que van falar col escritor Vicente García Oliva sobre’l so llibru Fontenebrosa: el reinu de los silentes. Esta actividá va celebrase’l xueves 2 de mayu a les 10 de la mañana na Casona del Bravial de Blimea, onde esti grupu va visitar tamién la esposición mentada enantes de la mano d’Esther Prieto, responsable de la editorial Trabe.
Xunto con toes estes actividaes va llevase a cabu una nueva iniciativa destinada al comerciu y que tien como finalidá llevar les lletres asturianes per tol conceyu.
Baxo l’eslogan “La llingua nel escaparate”, a lo llargo de toa esta selmana establecimientos comerciales de tou tipu de Blimea, Sotrondio y L’Entregu van llucir nel so escaparate llibros n’asturianu.
Dende la páxina de facebook de la Oficina de Normalización Llingüística del conceyu van facese entrugues rellacionaes con esos llibros, y les persones que les respuendan van poder consiguir llibros de regalu.
En resume, actividaes pensaes pa que nesos díes les lletres asturianes seyan les protagonistes a lo llargo y ancho de tol conceyu.
(29 d’abril de 2013)
