Fernando Menéndez, gallardonáu col III Premiu Timón de L’Arribada
L’escritor mierense -afincáu en Gijón/Xixón- Fernando Menéndez ye’l ganador del III Premio Timón, convocáu p’autores asturianos en llingua castellana pola Asociación Cultural L’Arribada, según alcuerdu d’un xuráu aconceyáu’l pasáu 5 de xunetu en Gijón/Xixón y formáu por Virginia Álvarez Buylla, Marián Suárez, Xicu Monteserín, Aurora García Rivas y Humberto Gonzali.
Pa esta edición optaron a los gallardones escritores que nacieren nel añu 1.962 o anteriormente. La distinción consiste nuna obra del escultor y ceramista xixonés Jesús Castañón, que s’entregará mientres la cellebración de L’Arribada 2012, nel viniente mes de setiembre.
Fernando Menéndez (Mieres, 1953) ye poeta y grafista, llicenciáu en Filosofía pola Universidá de Salamanca. Ta consideráu como un magníficu representante del xéneru aforísticu. Participó na fundación del grupu poéticu Aeda, que’l so primer númberu apaeció en 1978. Formó parte del colectivu salmantín Orilla izquierda. Ente los sos trabayos destaca una numberosa serie de llibros manuscritos ya illustraos que fueren espuestos en delles ocasiones.
Ye autor, entre otres obres, de Sinfonía interior (1979), Azul marino (1984), Sentir-se (1985), Gotas de Silencio (1986), Latitud Interior (1988), Versos Vagos (1992), Sin Fondo (1998), Contigo (1999), Sombras de luna (2001), Aguatinta (2005), En la oquedad de tu nombre (2006), Hilos sueltos (2008). Ta acabante ganar el Premiu Lliterariu Internacional de la Fundación Naji Naaman 2012.
Los ganadores anteriores d’esta modalidá de los Premios Timón fueron Luis Fernández Roces (2010) y Juan Méjica (2011).
(11 de julio de 2012)
