María Esther García y Olga Cuervo lleven ‘Quiero ser arcu iris’ a L.luarca
La escritora María Esther García López (Valdés, 1948) presenta esti vienres 12 d’avientu, a les 19:30 hores, el volume Quiero ser arcu iris, editáu por Pintar-Pintar. L’actu de presentación d’esti cuentu en versu ilustráu por Reyes Fernández Medina va tener llugar nel Salón d’Actos de la Biblioteca y Casa Cultura de L.luarca (C/ Olavarrieta, 24).
La presentación d’esta obra que supón la vuelta de García López a la lliteratura pa los más pequeños, va escomenzar con una escenificación del cuentu, pa neños y neñes d’ente 4 y 8 años, a cargu de l’actriz Olga Cuervo. Xunto a elles, amás de la ilustradora, tamién va tar Ángela Sánchez, representante de la editorial, así como Teresa Estrada Villazón, directora de la Cruz de los Ángeles, fundación a la que l’autora donó los derechos pola venta d’esti llibru.
María Esther García López ye autora d’una estensa bibliografía na que destaquen llibros de poemes como L.luribaga, Zamparrampa, Tiempu d’iviernu, Faraguyas (Haikus), o Pisadas. En narrativa destaquen obres como El tatuaxey Historias de vida ya señas de muerte. Autora tamién de dellos títulos de lliteratura infantil como Musical-landia, Menú de versos y Deva y el Pitín, na so última publicación hasta esti Quiero ser arcu iris, recopilaba una serie d’artículos publicaos en prensa ente los años 2009 y 2010, amosando una visión de los animales dende un puntu de vista etnográficu y sentimental baxo’l títulu d’Alredor de la quintana: animales y otros bichos.
