L’escritor Xosé Bolado ye galardonáu col VIII «Premiu Timón»
L’escritor Xosé Bolado ta acabante de ser reconocíu col VIII Premiu Timón pa escritores en llingua asturiana o en gallego-asturiano, convocáu pola Asociación Cultural L’Arribada, según alcuerdu d’un xuráu integráu por Aurora García Rivas, Alberto Álvarez Peña, Miguel Rojo y Lluis Portal Hevia, y presidíu por Humberto Gonzali. Un galardón que quier distinguir una trayectoria lliteraria y pal qu’optaben aquellos escritores que nacieren nel añu 1964 o enantes.
Xosé Bolado nació n’Uviéu en 1946. Académicu de la Llingua, profesor de lliteratura, estudiosu de la lliteratura asturiana y poeta mesmo n’asturianu qu’en castellanu, ye autor de la Antoloxía poética del Surdimientu (1989). Como antólogu y críticu lliterariu ye autor tamién del prólogu, les notes y la bibliografía de Escritores en Llingua asturiana (1992), de la colección Grandes autores asturianos de la editorial Hércules-Astur; de dos llibros de Rosario Acuña, y del fascículu «Lliteratura asturiana contemporania» de la Historia de Asturias del periódicu La Nueva España. Amás, tien publicaos dellos trabayos y artículos sobre l’actual panorama de les lletres asturianes.
Publicó tamién los siguientes llibros de poesía n’asturianu: Conxura contra la decadencia (Llibros del Pexe, 2002), Na estación de los relevos (Llibros del Pexe, 2006) y La bona intención (en formatu billingüe, Impronta Editorial, 2012). Fue presidente del Atenéu Obreru de Xixón, onde fundó la colección poética Deva, y primer director de la revista creativa de l’Academia de la Llingua Lliteratura.
El galardón va ser entregáu’l próximu 27 de setiembre, nos actos de celebración de La Vagamar 2014, y consiste nuna obra del escultor y ceramisma xixonés Jesús Castañón. Los ganadores d’anteriores ediciones del “Premiu Timón” fueron: Nené Losada Rico (2007), Xuan Xosé Sánchez Vicente (2008), Manuel García ‘El Galano’ (2009), Roberto González-Quevedo (2010), Vicente García Oliva (2011), Antón García (2012) y Miguel Rojo (2013).
(Fotografía: José Javier Fernández)
