Esti sábadu, puesta de llargu del ‘Testamentu’ d’Elias Veiga
Esti sábadu, 16 de payares, a les 18’00h, el Hotel Palacio de Meras de Tinéu va acoyer la presentación del llibru Testamentu, del nuesu compañeru Elías Veiga, responsable de la Biblioteca de Navelgas, poeta y escritor. Con esti poemariu algamó la XXI edición del Premiu Teodoro Cuesta de Poesía, el más prestixosu de tolos que se fain n’Asturies y que fueran ganando a lo l.largo d’estos últimos años les voces más sobresalientes de la l.literatura asturiana.
Nel actu de presentación Veiga va tar acompañáu pol escritor Adolfo Camilo Díaz y pola editora Esther Prieto y cuntará cola actuación musical de Nicolás Fernández Suárez («Vigulin»). Los asistentes tamién podrán esfrutar d’un recital poéticu, con poemes del propiu poemariu al cargu de Manuela Fernández Suárez. Ingredientes toos ellos más que prestosos pa faer de la cita una velada de lo más interesante y entretenida.
Cona pa.l.abra serena que da’l pasu del tiempu ya l’alcurdanza, asina escribe Elías Veiga esti poemariu que quier ser testamentu d’un mundu que vei cambiando, pero onde tovía al.l.uma’l burrayu de lo que fuora:
“Dalgo quedóu, un sueñu, un árbol,
una imaxe d’esperanza
ou’l recuerdu qu’inda queima
no corazón del augua
la simiente”
Testamentu ía’l documentu escritu que guarda las pal.l.abras de casa, los sueños de la nuesa xente, tamién las derrotas ya la distancia, pero sobre too l’espíritu d’un pueblu que nos fai ser como somos.
Elías Veiga (Presnes, Allande, 1972) ía yá una voz consolidada, pura y clara, de la poesía asturiana con dos poemarios publicaos: La tierra fonda (2004) y El Robinson Astur (2007), pol que recibióu’l Premiu de la Crítica d’Asturias nel 2008.
(14 de payares de 2013)
