Alejandro Fernández-Osorio presenta en Xixón ‘Magaya’
El xueves 11 d’avientu, a les 20:00 hores, la llibrería La Revoltosa de Xixón (C/ Juan Alonso, 12) va acoyer la presentación del poemariu Magaya, editáu por Impronta y del que ye autor Alejandro Fernández-Osorio. Nel actu, va tar acompañáu polos escritores Héctor Gómez Navarro y Sofía Castañón.
En palabres del poeta y críticu Xosé Bolado, “en Magaya’l llector sigue’l procesu d’una vuelta emocionada ya irónica al orixe. Con mirada cariñosa pero nada afalagadora’l poeta muestra l’interior d’una vida que ye trabayu y amor a la tierra. Lloñe del costumismu y el coloríu folklorista, Magaya entra nel corazón del arte, onde se mezcla la durez dela gaspia cola la esperanza tienro de la semiente. Colos matices de quien conoz los recursos d’una llingua popular rica constrúyese un ambiente reconocible d’una materialidá tan histórica como recreada. Una manera evocadora d’entrar na historia pequeña de quien al dise dexa tres de sí la puerta apenes entornada”.
Alejandro Fernández-Osorio (Villayana, Asturies, 1984). Llicenciáu en Psicoloxía pola Universidá de Salamanca y especialista en Psicoterapia Psicoanalítica, ye Máster n’Estudios Lliterarios pola Universidá Complutense de Madrid. En 2008 publica’l so primer poemariu, La exactitud del instante; y en 2012 aparez Frontería —Premiu Asturias Xoven de Poesía 2011—. Magaya ye’l so tercer poemariu asoleyáu.
