Candidatures pa los Premios Timón 2012 de L’Arribada
El 30 d’abril zarrará’l plazu de presentación de candidatures pa los Premios Timón 2012 entamaos por L’Arribada. Estes candidatures pueden ser presentaes por una persona o un colectivu nes señes de corréu electrónicu de l’asociación: larribada@gmail.com.
Pa esta edición, opten a los gallardones los/es escritores que nacieren nel añu 1.962 o anteriormente. Trátase del VI Premiu Timón, p’autores en llingua asturiana y n’eonaviego, y del III Premio Timón, p’autores asturianos en llingua castellana.
P’alcordar los gallardones, l’asociación convocará dos xuraos, ún por cada modalidá, formaos por persones venceyaes a la cultura del país. Estes distinciones, consistentes nuna obra del escultor y ceramista xixonés Jesús Castañón pa cada premiu, entregaránse mientres la cellebración de L’Arribada 2012.
Les candidatures presentaes hasta agora son:
Pal VI Premiu Timón (autores en llingua asturiana y n’eonaviego):
Manuel Asur, Sabel de Fausta, Joaquín Fernández García, Antón García y Miguel Solís Santos.
Pal III Premio Timón (autores asturianos en llingua castellana):
Fernando Menéndez, Carmen Gómez Ojea y Carmen Ruiz-Tilve.
Los ganadores anteriores del Premiu Timón fueron Nené Losada Rico (2007), Xuan Xosé Sánchez Vicente (2008), Manuel García ‘El Galano’ (2009), Roberto González-Quevedo (2010) y Vicente García Oliva (2011); y los del Premio Timón, Luis Fernández Roces (2010) y Juan Méjica (2011).
Vagamar Literaria 2012
Esti añu la Vagamar Literaria va desarrollase en dos partes, la primera en xunetu y la segunda en setiembre. Ésta última va tener como exa central les muyeres escritores d’Asturies. Nella va analizase’l so pesu na lliteratura asturiana nun progama qu’incluyirá espacios de debate, presentaciones, recitales y otros actos que se sucederán del 19 al 22 de setiembre nel Centru de Cultura Antiguu Institutu de Xixón.
Amás de la Vagamar, dientro de la estaya Rolda ta diseñándose un programa que s’abrirá al empiezu de mayu. Per otra parte, l’actividá de L’Arribada 2012 llegará tamién al occidente del país.
(6 de marzo de 2012)
