Dir a Venus

Dir a Venus

Hermino Fernández Camblor / Il. Sandra Estrada

Pintar-Pintar

24 pág.

///

Pintar-Pintar caltien firme’l so compromisu cola llingua asturiana, tanto editando los sos llibros en castellán y n’asturianu como publicando puramente nesti postreru. Nesta ocasión ufiértanos  Dir a Venus, una bella hestoria en redol a lo que significa eso de ser «hermanu mayor».

«Nel ta fartu de facer d`hermanu mayor. Ocho años que fexo la nueche de San Xuan y, como ta de vacaciones, tien qu’entretener a los hermaninos, esos ñarros que lu tienen apolmonáu: que si xueguinos, que si coches teledirixíos, cuentinos pa dormilos; pa eso ye mayor. Pero pa tornar al salón colos pas depués de dormíos los nenos, ye pequeñu, y tien que dir a la cama ensin ver la película de la tele».

A Nel -un nenu aburríu y contrariáu- ocúrrese-y na menos que pegar un blincu al espaciu, a Venus, l`astru rellumante que ve pela ventana. La Tierra fala con Venus, pero la cosa complícase. Talamente paez que los astros tean compinchaos pa da-y a Nel una doble lleición: la del Sistema solar (¡otra vuelta a la escuela!) y otra que Nel nun cuntaba topar al entamar el so viaxe espacial.
El testu de Herminio Fernández vien a les manes y la mirada del llector afalagáu poles suxeridores illustraciones de Sandra Estrada, que sofiten la so suavidá llírica.

(22 de marzo de 2012)