IV Xunta d’Escritores ya outros profesionales, na Casa Natal del Padre Galo, en Cadavéu
La casa natal del Padre Galo, en Cadavéu (Valdés), acueye esti sábado, 16 de febreru, la IV Xunta d’Escritores ya outros profesionales, que vuelve cuntar cola presencia de dellos compañeros bibliotecarios y un interesante programa d’actividaes.
Estes actividaes van entamar a les diez de la mañana cola presencia de Daniel González Suárez y Balbino Suárez Cortina, conceyales de Valdés, Xosé Ramón Iglesias Cueva, miembru de l’Academia de la Llingua Asturiana, Ana Fueyo (Directora Xeneral de Política Llingüística y José Modesta Vallina Ibáñez, alcalde de Valdés. Darréu, Rafa Lorenzo, Dani García y Fred Bougovin van ufrir a los asistentes una actuación poético-musical.
A les 11:00 hores, va tener llugar la primer mesa d’alderique, que va tratar sobre Cine y Llingua Asturiana, cola participación d’Humberto Gonzali, escritor, Inaciu Iglesias, empresariu, Pedro Gilthoniel, organizador d’actividaes cine-forum, Santiago Rodríguez, bibliotecariu de Tinéu y René Baizán, productor de cine.
A les 11:30 va celebrase otra mesa titulada La llingua asturiana y el teatru. Nesta ocasión, l’alderique protagonizalu Andrés Presumido, director de teatru, Esther García López y Xosé Ramón Iglesias Cueva, escritores y miembros de l’Academia de la Llingua Asturiana, Manuela Busto Fidalgo, bibliotecaria de Castropol, Alberto Rodríguez, actor y presentador de «De folixa en folixa», y Dora Méndez García, directora de la revista Cosiquines de Cadavedo.
La tercera y última mesa d’alderique va ser a partir de les 13:00 hores, y va tratar sobre La llingua y la cultura asturiana en xeneral y nel ámbitu llocal en particular, falando de la forma de tresmitila a les nueves xeneraciones, cuntando cola participación de Félix Menéndez González, bibliotecariu d’A Veiga, Carmen Guardado, escritora y profesora de primaria y llingua asturiana, Norberto Díaz Martin, director y profesor de colexu de Muñás, Javier Antonio Mainas, premiu «Alfonso Iglesias» de cómic, José Manuel Fernández Pérez, pregoneru de la fiesta de «La Regalina», Dani García de la Cuesta, investigador y músicu tradicional, Rafa Lorenzo, cantautor, y Xosé Nel Riesgo, escritor y director de la Fundación Municipal de Cultura de la Universidá Popular de Xixón.
A les 13:45 falaráse del Festival Vaqueiru na braña d’Aristébanu y de la fiesta de «La Regalina» con Mary Rico, faciendo darréu alcordanza de les figures de los escritores Padre Galo, Casimiro Cienfuegos, Román Suárez Blanco y Nené Losada.
(15 de febrero de 2012)
