‘Lletres Asturianes’, accesible a testu completu na rede, espubliza nuevu númberu

16/04/2012 biblioasturias

L’Academia de la Llingua Asturiana acaba de publicar un nuevu númberu del so Boletín Oficial: Lletres Asturianes. Nesti númberu 106 recuéyense nuevos artículos rellacionaos cola filoloxía asturiana y delles presentaciones presentaes nes pasaes Xornaes Internacionales d’Estudiu, celebraes el pasáu mes de noviembre.

Nelles presentábase tamién la versión dixital de Lletres Asturianes, que suma dende entós a la so apaición en papel la disponibilidá de la descarga de tolos sos artículos a testu completu y de baldre dende la so web.
Igualmente, l’Academia ufierta tamién los númberos escosaos de Lletres Asturianes, que tamién pueden descargase en formatu pdf, teniendo como oxetivu llegar a ufiertar toos númberos del Boletín-Revista. Pel momento yá tán xubíos a la rede toos los publicaos a partir del añu 1994, siendo ésta una de les principales fontes de consulta sobre filoloxía, llingua y lliteratura asturiana.

Lletres Asturianes espubliza dos númberos añales, entamando a imprentase nel añu 1982. Dientro de cada númberu apaecen les estayes que vienen darréu:

1. Entamu o editorial (seición non fixa), onde s’inxer l’asitiamientu de l’Academia en rellación con aspeutos que se xulguen d’especial interés pal futuru de la llingua asturiana.

2. Trabayos orixinales d’investigación.

3. Reseñes bibliográfiques.

4. Notes y anuncies, que recueyen informaciones destacaes que cinquen a l’actualidá de la llingua y al facer de la Institución, asina como un apartáu específicu de “Llibrería Asturiana”.

5. Normes pa la presentación de trabayos.

Lletres Asturianes asoleya trabayos científicos orixinales que tengan como oxetu del so estudiu la llingua y la lliteratura asturianes, entendíes nun sen ampliu y na so rellación col ámbitu románicu. Del mesmu mou, amiesta tamién otros trabayos de calter antropolóxicu, pedagóxicu y sociollinguísticu, enfotaos toos ellos na meyora de la conocencia, la problemática y la normalización de la llingua asturiana.

(15 de abril de 2012)