Saltadera estrena la colección ‘Llibros del Campo de los Patos’ con ‘Los 154 poemes’, de K. P. Kavafis, traducíos al asturianu por Xosé Gago
La editorial Saltadera, empresa qu’edita la revista Campo de los Patos y produz el programa de la TPA “La Bolera”, da empiezu a una nueva etapa editorial col nacimientu de la colección “Llibros del Campo de los Patos”. Pal estrenu d’esta colección escoyóse un llibru muy especial: Los 154 poemes, la poesía completa del poeta griegu K.P. Kavafis traducida al asturianu por Xosé Gago, cola que se quier sumar a les cellebraciones qu’en tol mundu se tan faciendo del 150 aniversariu del nacimientu del poeta alexandrinu. La obra yá ta nes llibreríes, nuna edición que nun cuenta con nenguna ayuda, nin pública nin privada.
De la mano del so editor, Antón García, nun nos quepe dulda qu’esti nuevu sellu editorial va apurrir a la lliteratura asturiana munches interesantes publicaciones, siendo una nueva referencia a siguir pa toos los llectores.
Konstandinos Petros Kavafis ye ún de los grandes poetes occidentales. Construyó la so obra, curtia, revisándola de contino, publicando en dalgunes revistes y en fueyes volandiegues, ensin priesa. Contribuyó de manera esencial a modernizar la llingua griega. A la so muerte dexó un corpus pequeñu: 154 poemes autorizaos pa la so publicación, que nun van ver la lluz en xunto hasta 1935, yá muertu’l poeta. Son los que se recueyen nesti llibru, n’edición conmemorativa de los 150 años del so nacimientu.
Kavafis buscaba que’l so estilu fuera sobriu, prosaicu inclusive, mandándose d’un tonu coloquial que diba facer fortuna na poesía del sieglu XX. Él mesmu s’encargó de señalar la ironía como ún de los rasgos más destacables del so llabor poéticu. Supo, como naide, fundir nos sos textos les referencies históriques, artístiques y personales. El traductor, Xosé Gago, yá dixo en 1989 qu’esa obra se llevantó “sobre la meditación de l’aventura humana, plasmada en situaciones y actitudes de la historia del so pueblu, sobre la conciencia de la soledá y la inanidá del destín humanu, sobre la señardá de l’acordancia y la contemplación de lo bello”.
Nació Kavafis n’Alexandría d’Exipto en 1863. De familia griega y pudiente, arruínase al morrer el padre, y ponse a trabayar de funcionariu na alministración hasta que se xubila. La principal dedicación na so vida foi la de perfacer la so poesía. Muerre na mesma ciudá na que naciera en 1933.
Xosé Gago (Turón, 1957) yá s’ocupó de la poesía completa de Safo (Poemes y fragmentos, 1985) y tien publicada en versu la primer parte de la Odisea d’Homero (2007). En 1989 preparó l’antoloxía Venticinco poemes de K. P. Kavafis. Amás d’otros poetes y poemes griegos (y dalgún cuentu propiu) espardíos per delles publicaciones, nel númberu 1-2 de la revista Campo de los Patos (2010-11) adelantó una parte de la so poesía baxo’l títulu “15 poemes de Díes de los 80”.
(17 d’avientu de 2013)
