Música y lliteratura van de la mano nel espectáculu ‘Palabres’ del Grupu de Baille San Félix de Candás

El vienres 8 de payares, a les 20h., el Grupu de Baille San Félix de Candás va estrenar l’espectáculu Palabres, organizáu en coproducción col Teatru Prendes de Candás y l’apoyu del Conceyu de Carreño. Un proyectu qu’axunta música y lliteratura que va tener una segunda función el sábadu día 9 nel mesmu escenariu, y que se va llevar a diferentes llugares d’Asturies a lo llargo de 2013 y 2014.

Depués de más d’un añu de trabayu, el Grupu de Baille San Félix anuncia esti proyectu que consideren, en fondu y forma, el más arriesgáu nos trenta años de trayectoria que tien esta formación. “Palabres defínese como una propuesta artística multidisciplinar que, sofitada na ellaboración d’un análisis críticu de la situación actual de la llingua asturiana -en toles sos variantes- desendolca una obra onde lliteratura, artes escéniques, arte audiovisual, música y baille tradicional interactúen de manera simultánea nun mesmu espaciu escénicu. Asina, quier que se xenere un nuevu discursu artísticu que s’articula alredor de dos puntos: el respetu a la tradición propia; y l’anovación y creación de víes d’accesu afayadices p’atraer a nuevos públicos, interesaos en reflexonar sobre’l propiu conceutu “tradición”. Too ello con un denominador común y central: el poder de la palabra.”

Con un llabor de loxística complexu, esti espectácuu naz a propuesta del Grupu de Baille San Félix de Candás, desarrollando una idea orixinal de Xurde Fernández. La música orixinal cuerre por cuenta de Marcos García Alonso y Mapi Quintana, que van tar acompañaos de Rubén Bada (guitarres y bouzouki); Fernando Arias (percusiones); y Thomas Welvaadt (trompeta) pa poder facer realidá la banda sonora d’esti viaxe.

En Palabres tamién van a participar dalgunos de los principales nomes de la lliteratura asturiana. Asina, tal y como anuncia’l grupu, van participar autores como Aurelio García Ovies, Xandru Fernández, Pablo Texón, Concha Quintana, Elías Veiga, y Xosé Miguel Suárez. Otramanera, les empreses productores Proima-Zebrastur y Sr. Paraguas ocúpense nel apartáu técnicu; mentes que Magar Cultura faise cargu de la coordinación de tolos participantes pa dar forma a un ambiciosu proyectu que va ser estrenáu los díes 8 y 9 de payares y que se presenta col siguiente teaser: