Pablo Antón Marín Estrada presenta en Xixón ‘Un palaciu enllenu ortigues’

L’escritor Pablo Antón Marín Estrada (Sama, Llangréu, 1966) presenta esti vienres día 18, a les 20 hores, el volume Un palaciu enllenu ortigues, qu’edita Suburbia Ediciones. L’actu de presentación va tener llugar na llibrería La Buena Letra (C/ Casimiro Velasco, 12) de Xixón.

“Pañó les monedes mui dignu, igual que lu viera facer enantes nes meses de xunta la nuestra. Diónos les bones nueches y de la qu’enfilaba a la busca de nuevos clientes repitiólo:

—Yo en Asturias tengo un palacio…

Y ente dientes, ente aquellos dientes, seguramente escasos y podres pola piorrea añadió:

—…l.len d’ortigas…”

Asina remata’l primer capítulu de la que ye la última publicación de Marín Estrada, ún de los principales referentes de la lliteratura asturiana contemporánea, autor de llibros fundamentales mesmo en versu qu’en narrativa. Ganador del Premiu de Novela Xosefa Xovellanos con La ciudá encarnada, el so anterior publicación fue’l poemariu Despidida (Suburbia Ediciones 2011). Sicasí, Marín Estrada vuelve agora a la narrativa que tantu prestixu-y dio con obres El amor en La Habana, de la mano de la editorial Suburbia Ediciones de la que ye responsable Silvia Cosío.

Pablo Antón Marín Estrada ye autor d’una estensa bibliografía. Asina, amás del citáu Despidida, en poesía tien editaos Animal estrañu (KRK, 2010), Los baños del Tévere (VTP, 2003), Otra Edá (Trabe, 2000), Un tiempu meyor (Trabe, 1996) y Díes d’inocencia (Trabe, 1992). Per otra parte, como narrador publicó les noveles Mientres cai la nueche (Trabe, 2010), La boca puerca (Trabe, 2008), Los caminos ensin fin (-Premiu Abril de Narrativa-, Editores Asociados, 2000) y La ciudá encarnada (SPPA, 1995, Ed.Trea, 2009).

Ye autor tamién de los llibros de relatos Secretos y dos sombres (Ámbitu, 2005), Nubes negres (Trabe, 1998), Esa lluz que naide nun mata (Trabe, 2005) y Xente d’esti mundu y del otru (Llibros del Pexe, 1992). Dientro la so obra narrativa figuren tamién dos entregues d’un diariu Agua que pasa (VTP, 1995) y Suma y sigue (VTP, 1998). Otres obres publicaes son la pieza teatral Cuando Artur marchó a la isla d’Avalón (Ámbitu, 2004) y l’amuesa de versiones poétiques La maleta de Simbad (Llibros del Pexe, 2001). En 2003 la editorial Debate dio a estampa la traducción al español d’El Amor de La Habana, obra miscelánea que recueye testos narrativos dispersos y publicaos orixinalmente en llingua asturiana.

Al llau de la so actividá editorial y periodística, tien impartío diversos talleres de creación lliteraria y d’animación a la llectura, el más recién n’ochobre de 2011 na Universidad Internacional de Andalucía en Sevilla, dientro los alcuentros Cruce de miradas y embaxo’l títulu Literatura y fotografía, en collaboración col fotógrafu José Manuel Navia. Otramiente, Marín Estrada ye anguaño colaborador del diariu El Comercio.