Impronta estrena una nueva colección con “El llibru de les vocales”, de Francisco Álvarez Velasco

Dende la so puesta en marcha, la llibrería La buena letra (c/ Casimiro Velasco, 12, Xixón) tien convertíose nun puntu d’encuentru obligáu y referencial pa l’amuesa de les novedaes editoriales asturianes. Y col empiezu de la temporada nueva retoma l’actividá cola presentación del últimu llibru de Francisco Álvarez Velasco (Cimanes del Tejar,León, 1940).

Asina, esti vienres 20 de setiembre, a les 19’30 hores, l’escritor tinetense Miguel Rojo va facer de maestru de ceremonies pa introducir el volume El llibru de les vocales, que publica la editorial Impronta, estrenando la colección Fierabrás. Esta serie de la editorial Impronta llega en formatu álbum y con ilustraciones de Graffiti/Marina Lobo, que compaxina un estilu vintage con propuestes más novedoses. Asina, tal y como anuncien dende Impronta, “los llectores nuevos van atopar nella textos caracterizaos pol amor al llinguaxe, a los cantares y a los xuegos de pallabres”.

El llibru de les vocales “asítiase ente’l xeneru poéticu, les cosadielles y los cantares de siempre, coles cinco vocales del nuestru alfabetu como protagonistes. Un homenaxe a “Voyelles”, d’Arthur Rimbaud, sírve-y como pieslle cromáticu al llibru”, destináu a llectores d’ente 4 y 9 años.

Autor de llibros como Noche (IX Premio Internacional de Poesía “Antonio Machado en Baeza” y Premio de la Crítica de Asturias en 2006); Las aguas silenciosas; o La Luna tiene una liebre / La Lluna tien una llebre, Oviedo, Pintar-Pintar, 2009, Francisco Álvarez Velasco vuelve agora a los estantes de les novedaes editoriales con un orixinal testu indicáu pa los llectores más mozos.

(18 de setiembre de 2013)