Presentación de ‘La guerra de les sacaberes’ en Les Vegues

El miércoles 9 d’avientu a les 18 hores va presentase nel Centru Sociocultural de Las Vegas/Les Vegues, la traducción asturiana de la novela La guerra de les sacaberes de Karel Kapec, publicada por Ediciones Trabe. Karel Kapec ye ún de los grandes nomes de la lliteratura checa y nesta novela satírica desplica l’ascensu del totalitarismu, l’odiu al distintu o la esplotación obrera nuna Europa que mira de revisgu lo qu’asocede na Alemaña nazi ensin ser a entendelo nin a saber (nin querer) paralo.

Na presentación vamos contar con Cesáreo García, traductor al asturianu de la obra de Kapec. Cesáreo García ye llicenciáu en Filoloxía Inglesa pola Universidá d’Uviéu, espertu en llingua asturiana y en llingües eslaves; autor, ente más otres, de traducciones como Un héroe del nuesu tiempu de Mijaíl Lermóntov, Frankenstein de Mary Shelley o Cuentos eslovacos de Pavol Dobsinsky, tamién fizo parte del equipu de traductores encargáu de la versión asturiana de la Biblia.

Van acompañar al traductor na mesa, Rafael Rodríguez Valdés, responsable del Serviciu de Normalización Llingüística de Corvera, y Esther Prieto, responsable d’Ediciones Trabe. La editorial va poner a la venta exemplares del llibru mesmo que d’otres traducciones.

L’asistencia ye llibre y de baldre.