L’alcuentru cola escritora Paula Pulgar abre’l “Veranu Lliterariu 2013” de Corvera

Biblioteca de Las Vegas/Les Vegues acueye un nuevu “Veranu Lliterariu”, una actividá de promoción y animación a la llectura de lliteratura infantil n’asturianu, organizada pola Casa de la Llingua-Serviciu de Normalización Llingüística de Corvera, que va desarrollase a lo llargo de los meses de xunetu y agostu.

L’actividá, d’asistencia llibre y gratuita, consiste n’alcuentros ente escritores y tolos/es neños/es que quieran asistir; cada escritor acerca y cuenta una de les sos producciones lliteraries a los rapacinos, n’alcuentros d’una hora de duración, que poles sos característiques dan en ser distintos y únicos.

El “Veranu Lliterariu 2013” entama’l llunes 1 de xunetu cola participación de la escritora Paula Pulgar Alves, que va dar a conocer les Primeres aventures de Pulgu y Yolín. Paula Pulgar, llicenciada en Filoloxía Hispánica pola Universidá d’Uviéu y profesora d’Enseñanza Secundaria, yá tien una trayectoria como investigadora y escritora n’asturianu, con obres p’adultos como Cuentos de metru y centímetru (Ámbitu) y Calidoscopiu (Trabe) y pa neños, casu d’El mundu de Susana y Primeres aventures de Pulgu y Yolín(Asturtoons).

Los alcuentros van facese tolos llunes de xunetu y agostu n’horariu de les 11:30 a les 12:30 hores. El calendariu de participación de les y los escritores ye’l que s’indica darréu:

Llunes 1 de xunetu:

Paula Pulgar Alves

Llunes 8 de xunetu:

Alberto Álvarez Peña

Llunes 15 de xunetu:

Inaciu Galán

Llunes 22 de xunetu:

ACD

Llunes 29 d’agostu:

Sidoro Villa Costales

Llunes 5 d’agostu:

Xurde Fernández Fernández