Presentación de ‘El llibru nuevu’ de Xuan Bello

El vienres 28 d’abril a les 19:00 hores na Biblioteca d’Asturies “Ramón Pérez de Ayala”, entamao por Foro Abierto, Xuan Bello va presentar el so llibru de poemes El llibru nuevu. Nel actu van participar tamién Antón García, escritor y editor de Saltadera, y Amelia Valcarcel, catedrática de Filosofía Moral y Política de la UNED.

Xuan Bello, primer Premiu Nacional de Lliteratura, dexó de publicar poemes hai venti años pero non d’escribir poesía, como saben los llectores de los sos llibros en prosa. Agora, n’El llibru nuevu (qu’apaez dos décades depués de Los caminos secretos) hai muncho más que poesía, convirtiendo esti xéneru nel mediu que-y permite ellaborar el discursu d’una conciencia moral. Nesta nueva entrega esamina la propia existencia dende una perspectiva arriquecida que va de lo personal a lo xeneracional y social.

Constrúi asina un llibru políticu nel sentíu más esencial de la palabra, un estudiu de la xeoloxía de la vida que nun dexa veta ensin remover, cola intelixencia y la maestría de quien conoz bien el valor consolador y prevocador de la palabra por más qu’anuncie querer “salise de les palabres” pa usales como guía más que como conxuru.

Bello algama nesti llibru los momentos más altos de la so obra poética, convertida agora nuna reflexón sobre la vida na que nada ye ayeno por más que too pareza extraño.