Vanessa Gutiérrez presenta ‘El paisaxe nuestru’

El llunes 22 de mayu, a les 19:00 hores, na Librería Cervantes d’Uviéu presentase el llibru El paisaxe nuestru, de Vanessa Gutiérrez, una obra prologada por Martín López-Vega col que l’autora ganó la última convocatoria del Premiu «Fuertes Acevedo» d’Ensayu que promueve el Principáu d’Asturies. Baxo la presidencia de Fernando Padilla Palicio, Director Xeneral de Planificación Llingüística, Xuan Bello va facer la presentación del llibru.

Anque’l volume llegue arropáu por un premiu d’ensayu, hai que ponelu en relación cola so obra creativa, en concretu con La cama, l’esitosu llibru en prosa publicáu en 2008. Agora Vanessa Gutiérrez percuerre los paisaxes de los sos mayores buscando nellos la memoria social, respuestes a les entrugues eternes sobre la vida (la d’antes, que configura’l nuesu presente: d’equí venimos). Failo apoyándose nun xéneru casi escaecíu, les apasionantes «topografíes médiques» del primer terciu del sieglu XX, dende les que la medicina intentaba esplicar cómo yera (desenvolvimientu material, cultural y espiritual) y cómo-yos gustaría a aquellos médicos que fora la sociedá del so tiempu a la qu’emprestaben atención.

El paisaxe nuestru resulta asina una obra mayor, que se llee con prestar y fácilmente, y que llogra faer meyor que nengún otru llibru la semeya de la comunidá social a la que pertenecemos.