Presentación del poemariu ‘Difícil’ de Xurde Fernández

El xueves 8 de xunu a las 19:30 hores na biblioteca “Carlos González Posada” de Candás va presentase’l poemariu Difícil, de Xurde Fernández. Nel actu amás del autor van participar Ana Gloria Blanco, Carmen Dintén y Esther Prieto.

Difícil acueye trenta y cuatro poemes escritos con crudeza, que falen d’unes vides (les más d’elles bien nueves) difíciles, na llende que separa’l bien del mal, el vivir del morrer. Trenta y cuatro poemes de versu curtiu y crudu que formen un poemariu de corte social, o cívicu, pel que desfilen la droga, el paru, los deshaucios, el maltratu, la desestructuración familiar y, penriba too, el día a día d’unes vides rotes namás que por nacer nel tiempu y nel llugar equivocaos.

Xurde Fernández (Candás, 1975) ye llicenciáu en Filoloxía Hispánica y especialista en Llingua Asturiana, de la que pon clase nel institutu de Candás. Conocíu a lo primero como narrador (cuentista y novelista), tien delles obres editaes (Volver, 2007; El color del escaezu, 2008, xunta Marián García; La espera, 2008; Ucrania y otros nomes de muyer, 2009; Díes d’iviernu, 2009; Intentu d’escritura, 2010; y Aeropuertu, xunta Marián García, 2011). Pero ye tamién autor de testos dramáticos (Pa L’Habana, 2016) y d’una llarga retafila de llibros pa nenes y nenos.