Milio Rodríguez Cueto faese col V Premiu Josefa Canellada

El escritor xixonés Milio Rodríguez Cueto vien d’algamar la quinta edición del Premiu de lliteratura infantil y xuvenil en llingua asturiana “María Josefa Canellada”, que concede la Conseyería d’Educación, Cultura y Deporte del Principáu.

El xuráu aconceyose ayeri na Casa la Cultura María Josefa Canellada (Santolaya, Cabranes) baxo la presidencia de la directora xeneral de Política Llingüística, Ana María Fueyo, y cola participación del alcalde de Cabranes, Alejandro Vega, y de los escritores y especialistes en lliteratura infantil y xuvenil Severino Antuña y Mariluz Pontón. El xuráu contó, amás, cola participación de Alonso Zamora Canellada, fíu de la escritora que da nome al gallardón. Un total de seis trabayos optaben esti añu al premiu, dotáu con 4.000 euros.

Ente les obres presentaes, el xuráu decidió por unanimidá conceder el premiu al testu Carne de melandro, al valorar que se trata d’una novela de gran profundidá narrativa y bien resuelta, que recupera la memoria histórica d’una manera adecuada a la edá a la que va dirixida y abre caminos nuevos na lliteratura xuvenil n’asturianu. El testu presentóse baxo’l seudónimu Stephan Dedalus. Abierta la plica, l’autor resultó ser Milio Rodríguez Cueto.

Profesor de Llingua Española y Lliteratura, Milio Rodriguez ye autor de noveles, relatos y ensayos. Ganó varios premios lliterarios como’l Fuertes Acevedo d’ensayu (en 1992 y 1999), el Premiu Edebé de Lliteratura xuvenil (en 1999),  o’l Xuan María Acebal de Poesía. Traduxo al asturianu autores universales como Shakespeare, Stevenson, Oscar Wilde o Sade. Nel campu de la lliteratura xuvenil, aparte de les traducciones pa la revista Lleo-Lleo, tien publicaos dellos llibros en castellanu, como Laura contra el tiempo, Mimí al volante o La Piedra de la culebra. Tien fecho artículos d’opinión nel semanariu Les Noticies y nel diariu La Nueva España, y ahora puen seguise nel so blog Escureceres.

(17 de noviembre de 2012)

(Fotografía: VTP Editorial)