La Tertulia Malory entrega esti sábadu a Raquel F. Menéndez el so premiu al meyor llibru n’asturianu del añu 2017

La Tertulia Malory, de L’Entregu, va entregar esti sábadu, 25 d’agostu, a les 17:30 hores, el premiu al meyor llibru n’asturianu del 2017, nun actu público que se va celebrar nel pub Tom Malory de L’Entregu —onde, dende hai yá 20 años, la tertulia vien aconceyando selmanalmente—. La obra ganadora d’esta séptima edición del premiu ye’l poemariu El llibru póstumu de Sherezade, de la escritora de Salas Raquel F. Menéndez.

Anguaño, el xuráu formáronlu los escritores Xulio Arbesú, José Luis Rendueles, Pablo Rodríguez Medina, Solinca Turbón, David Fernán, Roberto Corte, Chechu García y Henrique G. Facuriella, que fallaron el premiu nun actu celebráu na tertulia’l 22 de xunu del 2018. Esti xuráu destacó, nel acta del fallu, «l’autenticidá de la voz poética y la verdá de les emociones que l’autora espeya en caún de los poemes, unes emociones que tienen como puntu de partida les rellaciones ente les tres protagonistes femenines del llibru: la propia poeta, la güela con alzhéimer y la madre. L’autora muéstrase heriede de un llinaxe femenín que se materializa nel conocimientu que vien al traviés de los oxetos probes –botones, alpargates, el café de pota…– pero, sobre too, de los cuentos, como aquellos colos que la Sherezade de Les mil y una nueches va consiguiendo ganar un día más de vida».

El gallardón consiste nuna ilustración d’Alfonso Zapico y una medaya conmemorativa, que se van entregar nun actu públicu en L’Entregu en feches próximes. Esta ye la séptima vez que’l grupu concede esti premiu, l’añu pasáu resultó ganadora Lluvia d’agostu, la novela de Francisco Álvarez sobre la vida de Buenaventura Durruti, y n’ediciones anteriores, premiáronse les obres L’aire ente la rama, d’Ángeles Carbajal; Más espeso que l’agua, de Consuelo Vega; Carne de melandru, de Milio Rodriguez Cueto; La Chelita, de Ruma Barbero, y La ñeve del Cuquiellu, de Xabiero Cayarga. Con esti gallardón, los sos entamadores quieren prestixar les lletres asturianes, al empar que se da difusión a les obres que, a criteriu del xuráu, sían consideraes los meyores llibros escritos cada añu n’asturianu.

El llibru póstumu de Sherezade, primer poemariu de la escritora Raquel F. Menéndez, ye una elexía en forma de diálogu imposible con so güela, la muyer que cuidó d’ella de pequeña, que-y aprendió a ver el mundu, y que, al final de la vida, alcuéntrase ensin memoria por culpa del alzhéimer. El llibru intenta responder a delles preguntes seique ensin respuesta: ¿Cómo reformular la esperiencia de la tierra y del cuerpu frente a la falta? ¿Cómo facer un rellatu familiar cuando paez que ta condenáu a ser póstumu? Los poemes d’El llibru póstumu de Sherezade fáense estes entruges mentá traten de reconstruyir la identidá al traviés de la escritura.

Raquel F. Menéndez (Vallouta, Salas, 1993) ye graduada en Llingua Española y la so Lliteratura pela Universidá d’Uviéu. Nel añu 2013, ganó’l III Concursu Lliterariu de la universidá asturiana col poemariu en castellanu Libélula (2013) y participó nes antoloxíes Siete mundos (2015) y Poesía, alma del mundo (2014). Los sos poemes n’asturianu tán espublizaos en revistes como Formientu y Lliteratura. Nel añu 2016 ganó’l Premiu Nené Losada Rico con El llibru póstumu de Sherezade.