Pablo Rodríguez Medina, Premiu ‘Xosefa Xovellanos’ 2013 pola novela ‘Fame d’amor, determín de pasión’.

La Conseyería d’Educación, Cultura y Deporte cierra’l plantel de galardonaos nos sos premios de lliteratura n’asturianu 2013 col fallu del Premiu Xosefa Xovellanos de novela, que cada añu déxanos un escelente encamientu de llectura na so obra ganadora. Nesta 34º edición recayó na novela Fame d’amor, determín de pasión, de Pablo Rodríguez Medina, unu de los escritores más prolíficos y más galardonaos de la lliteratura asturiana, que yá ganara esti mesmu premiu na so edición de 2001 cola novela L’arna de San Atanás

El xuráu encargáu de valorar les obres presentaes tuvo presidíu pola directora xeneral de Política Llingüística, Ana María Fueyo, y que tuvo formáu polos escritores Quique Faes, ganador de la edición anterior del galardón, Xuan Bello, Miguel Barrero y Lourdes Álvarez; amás de la técnica en materia llingüística María Esther Castro Manzano.

A esti gallardón, dotáu con 3.000 euros, podíen presentase noveles en llingua asturiana de tema, xéneru y estructura llibres, con una estensión mínima de setenta y cinco páxines, siempre que foren inédites y non premiaes n’otros concursos. Ente les obres presentaes, el xuráu decidió por mayoría conceder el Premiu a la novela titulada Fame d’amor, determín de pasión, destacando “l’esfuerciu narrativu tan sólidu, l’ambición y l’oficiu, amás del usu acertáu de rexistros variaos”. El testu presentóse col seudónimu Solombres de Casiano.

Pablo Rodríguez Medina (San Andrés de Llinares, Samartín del Rei Aurelio, 1978) ye llicenciáu en Filoloxía Hispánica y especialista en Filoloxía Asturiana pola Universidá d’Uviéu. Escritor n’asturianu y en castellanu, ganó bien de gallardones en dellos xéneros (ensayu, cuentu, novela, teatru, poesía…). Como narrador n’asturianu yá ganare, ex aequo, la edición del añu 2001 del Premiu Xosefa Xovellanos cola novela L’arna de San Atanás. Nesti xéneru, amás de la obra mentada, espublizó Los paraísos perdíos (2000), Ente semeyances (2001), Les vueltes, toles vueltes (2002), Los taraos (2003),Perreríes (2007), Vivir ensin probalo (2009), Música d’amor en guerra (2009) y Al aldu la memoria (2010). En poesía, Nel dialeutu del grisú (1999), Tiempu d’esiliu y povisa ayeno (2001), Los desconocedores del agua (2001), El color de l’ausencia (2004), Aires de mudanza (2007) y La edá de los caminos (2009). En teatru, Martema, historia d’una guerra, retratu d’unes culpes (2003), Orbaya (2003), Cantu de gaviotes (2006) y El santu (2009). Tamién cultivó la narrativa xuvenil coles obres Nun blinquen ayalgues(2003), Tapín de Picupáu (2006) y Ello ye too la xente, que nun mos compriende (2008).