Presentación de ’42.553. Depués de Buchenwald’ de Xuan Santori

El martes 12 de xunu a les 19:30 hores, nel Muséu Arqueolóxicu d’Asturies va facese la presentación de 42.553. Depués de Buchenwald, de Xuan Santori, obra ganadora del XIII Premiu Máximo Fuertes Acevedo. Nel actu, amás del autor, va participar Vicente García Riestra, protagonista de la obra y l’últimu superviviente español d’esti campu de concentración.

Esti llibru ye una oportunidá única pa empezar a encarar l’ayeri non tan llonxanu y reconocer y homenaxar a aquellos homes y muyeres que, fieles al ideariu republicanu, tuvieron qu’afuxir del país y depués implicase na resistencia francesa contra los nazis p’acabar o nos campos de concentración, o lliberando París o morriendo en batalles ensin sonadía pero bien importantes pal devenir d’Europa.

Xuan Santori (Uviéu, 1968). Doctor en Filoloxía pola Universidá d’Uviéu, ye autor de los llibros de poemes Les inconveniencies de la especie (Premiu Teodoro Cuesta 1999) y Según cumple’l día (Premiu Elvira Castañón 2007), de les narraciones La heredá y La fábrica de lluz, y del estudiu El Surdimientu y la lliteratura n’asturianu: normalización y estandarización (2013).