Presentación de ‘Caricote’ de Carla Menéndez Fernández

El xueves 12 de mayu a les 20:00 hores en la sala de conferencies del Centru Cultural Antiguu Institutu (Xixón) presentación del álbum infantil Caricote, de Carla Menéndez Fernández. Participa, amás de l’autora, Esther Prieto, d’Ediciones Trabe.

Caricote ye un perrucuspín que nun-y presta nada vivir, xugar o mesmo xintar en compañía, hasta qu’un día pínchase con un escayu… y entós entama barruntar que ll’aislamientu nun ye tan bono y qu’igual la compañía nun ta de más, inclusive pa facer arrollones peles cuestes del pueblu.

Tolos llibros d’esta colección tienen una temática o céntrense en personaxes mui bien averaos a la cultura asturiana, cuando d’anguaño, cuando del pasáu, cuando seres humanos, cuando animales emblemáticos de la tierra astur. Mui atractivos pa trabayar na aula cola reciella más nueva, tán ilustraos a color y encuardernaos a tapa.