Presentación de ‘El cuentu atrás’ de Xabiero Cayarga

Esti xueves 21 d’avientu, a les 20:00 hores, na librería La Buena Letra de Xixón, Xabiero Cayarga va presentar El cuentu atrás, editáu por Saltadera. Va ser l’escritor Ánxel Álvarez Llano quien fale del llibru y del so autor.

Esti volume con 336 páxines repasa cuasi 25 años d’escritura de contino, nuna selección rigorosa de la so obra publicada a la qu’amiesta catorce cuentos inéditos y dellos otros editaos en publicaciones de poca difusión. El llibru dexa realcontranos con un narrador espléndidu, mordaz y sollerte a los detalles; un narrador realista, un verdaderu maestru nel usu del asturianu, al que nun se-y escapa nengún tema: dalgo de costumismu, el gustu pola reflexón intelectual y la descripción culturalista, el cuentu eróticu, el misteriu no cotidiano… Na obra, al revés de lo que se suel facer, ordena de más nuevo a más vieyo, como si se tratare d’una cuenta atrás nel procesu creativu, dende les narraciones del llibru inéditu Cuentos de la lluz perversa a les primeres publicaes en Les gatileres del cielu.

Xabiero Cayarga (Cangues d’Onís, 1967). Collaboró hasta la so desaparición nel selmanariu asturianu Les Noticies. Publica artículos nes revistes Campo de los Patos (qu’edita la mesma casa editorial) y El Cuaderno. Cuenta con dalgunos de los más prestixosos premios de la lliteratura asturiana, como’l «Teodoro Cuesta», el «Xuan María Acebal», el de «Narraciones» de l’Academia de la Llingua Asturiana o el «Premiu de la Crítica d’Asturies». Dio a la estampa una docena d’obres de creación: los llibros de poemes El deliriu d’esclavu (2000), Pequeña Europa (2001), Les llingües de la Hidra (2006); la obra de teatru Favila, el príncipe reina (2004); les colecciones de cuentos Les gatileres del cielu (1994), Güelgues sobre’l llagu (1996), A flor de piel (2000), Obra en ruina (2007) y les noveles El boleru de Xabel (1994) y Trastes de bufarda (2005). Les dos entregues últimes tienen fecha del 2011: la novela El sol negru de Wewelsburg y el poemariu La ñeve del cuquiellu. Ye un traductor escelente de lliteratura de fala inglesa y sobre manera alemana.